Россельхознадзор инспиэктэрдэрэ саҥа сыһыарыынан үлэлиир кыахтаннылар

Судаарстыбаннай иниспиэктэр Айсен Петров миэстэтиттэн олорон саҥа "Инспектор" сыһыарыынан Илин Эҥэр улуустары кытта конференц сибээскэ тахсар. Кини сокуоҥҥа  уларыйыылары, онуоха олоҕуран саҥа ирдэбиллэри иһитиннэрэр.

Онон туохтан да тутулуга суох туһааннаах иһитиннэриини тута тириэрдэр.  Уруккута буоллар хайаан да илэ тиийэн билиһиннэриэхтээх этэ. Саамай сүрүнэ интернет ситимэ эрэ баар буолуон наада.

Айсен Петров, Россельхознадзор Амур уобалаһынааҕы уонна Саха сиринээҕи салалтатын судаарыстыбаннай иниспиэктэрэ: «Биһи үлэбититтэн ырааппакка эрэ номнуо видео нөҥүө бэрэбиэркэ оҥоруохпутун сөп. Ону таһынан профилактическэй тэрээһиннэри эмиэ оҥоробут. Үлэбитин чэпчэттэ. Ону таһынан сыһыарыыгар видео барыта хаалар, хаттаан киирэн көрүөххэ сөп».

Россельхознадзор иниспиэктэрдэрэ бу сыһыарыыны туһаныахтарыттан тыа хаһаайыстыбатын бордууксуйатын оҥорон таһаарар, харайар, таһар, атыылыыр  тэрилтэлэргэ 120  тахса консультацияны биэрдилэр. Итини сэргэ 4 хонтуруоллуур тэрээһиннэр ыытылыннылар. Итини сэргэ "Горнай Ас" хаһаайыстыбаҕа былааны таһынан бэрэбиэркэ ыыттылар. Итиэннэ кэһиилэр баалларын бэлиэтээтилэр. 

Петр Федотов, Россельхознадзор Амур уобалаһынааҕы уонна Саха сиринээҕи салалтатын судаарыстыбаннай иниспиэктэрэ: «Тэрээһиннэри тэйиччи сылдьан ыытабыт. Бүгүҥҥү күҥҥэ хаайтарыы кэмэ, онон сүрдээҕин табыгастаах».

Саҥа сыһыарыы иниспиэктэргэ эрэ буолбакка тэрилтэлэргэ эмиэ олус көдьүүстээх буолла. Бэтэринээринэй аптекалаах Изольда Семенова бу саҥа сүүрээни олус бигирээн сылдьар. туох мунаахсыйар боппуруостанна эрэ тута сыһыарыытын арыйан ыйытар. Аптека салаатыгар олус элбэх уларыйыы киирэр буолан Россельхознадзор иниспиэктэрин кытта ыкса үлэлэһэр.

Изольда Семенова, бэтэринээринэй аптека салайааччыта: «Аныгы үйэҕэ табыгас дии саныыбын. Ыйытыы киирдэҕинэ номнуо түргэнник эппиэт ылыахпын сөп. 2017 сылтан үлэлиибин уонна Россельхознадзору кытта наар сибээстэһэр буоллахпыт».

Онон "Инспектор" сыһыарыы үлэни тэтимиртэ диэн бэлиэтииллэр. Итини сэргэ хонутуроллуур кээмэйи улаатыннарда. Манна сүрүннээн докумуон үлэтин көрөллөр. Онон бэрээдэктээһиҥҥэ эмиэ улахан үлэ барда.