Олохтоох көҕүлээһини өйүүр бырагырааманан уһуйааҥҥа туустаах хос оҥоһуллуо
Бу Дьокуускайдааҕы 91 №-дээх "Үнүгэсчээн" оҕо саадын сэллик ыарыыны сэрэтэр, оҕо доруобуйатын чөлүгэр түһэрэр бөлөҕүн иитиллээччилэрэ эмтиир физкультуранан дьарыктана сылдьаллар. Маннык оҕолорго анаммыт икки бөлөх үлэлиир, кырачааннар төгүрүк суукка устата уһуйааҥҥа сылдьаннар доруобуйаларын бөҕөргөтөллөр. Оттон оҕо саадыгар 136 оҕо сылдьар, уопсайа 6 бөлөх баар.
Мария Федотова, Дьокуускайдааҕы 91№-дээх "Үнүгэсчээн" оҕо саадын сэбиэдиссэйэ: “Түөрт бөлөх Марха түөлбэтин оҕолоро буолаллар, икки бөлөх сэллик ыарыытын сэрэтэр, оҕо доруобуйатын бөҕөргөтөр буолаллар. Итини сэргэ төрөппүттэр баҕаларынан биир сахалыы “Чуораанчык” диэн сахалыы бөлөх арыллыбыта”.
Уһуйаан кэлэр 2026 сылга олохтоох көҕүлээһини өйүүр бырагыраамаҕа хапсар сыаллаах “Чэгиэн үнүгэсчээн” диэн бырайыак бэлэмнээбит. Бырайыак чэрчитинэн оҕо саадыгар туустаах хоһу оҥорон бэлэмниир соруктаахтар.Туус ионнарынан туолбут ураты микроклимат оҕо иммунитетын бөҕөргөтөрө дакаастанан турар. Онон тыынар уорганнарын чэбдигирдэр хайысхалаах үлэлиир оҕо саадыгар туустаах хоһу тэрийии тыын суолталаах.
Любовь Васильева, аҕа иитээччи: “Сэллик ыарыытын сэрэтии болдьоҕун учуоттаан бырагыраама оҥоһуллубута. Сыалбыт-сорукпут сэллиги сэрэтии уонна оҕо доруобуйатын бөҕөргөтүү буолар”.
Уһуйааҥҥа кырачаан оҕо доруобуйатыгар улахан болҕомто уураллар. Ол курдук хас биирдии оҕо күн ахсын кислороднай коктейль иһэр. Маныаха үрдүк хаачыстыбалаах састаабы туһаналлар. Туустаах хос оҥоһулуннаҕына, ыытыллар үлэ хайысхата кэҥээн, көдьүүһэ өссө эбии үрдүө этэ диэн бэлиэтииллэр.
Надежда Баишева, медсиэстэрэ: “Туус салгына тыынар уорганна үлэлэрин тупсарар, вирустары кытта утарсар кыаҕын күүһүрдэр уонна тирии ыарыыларыгар, сүрэххэ көмөлөһөр”.
Тыынар гимнастика, флейтанан оонньуурга үөрэтии, манна араас хайысхалаах үлэни ыыталлар.
Нарыйаана Татаринова, элбэх оҕолоох ийэ, төрөппүт сүбэтин салайааччы: “Биһиэхэ аллергиялаах, тыынар уорганнара ыарыылаах, сэлликкэ сыстар кутталлаах оҕолор фтизиятрияттан анабыл ылан кэлэллэр. Кинилэр чэгиэн буолалларыгар элбэх үлэ ыытыллар. Онтон биһиги төрөппүттэр олус диэн астынабыт. Мин оҕолорбор бу, чахчы, үтүө түмүктээх”.
Оҕо саадыгар өр кэм устата кырачааннар тымныйан ыалдьан, бронхиттаан элбэхтэ көтүтэллэр. Оттон туустаах хос баар буоллаҕына, бу кыһалҕа хайа эмэ аччыа этэ диэн эрэнэллэр.