"Якутия с тобой" хамсааһын ахсаанынан да, кээмэйинэн да хааччаҕа суох аадырыстаах баһыылканы тутар
Арктикатааҕы агротехнологическай университет устудьуоннара волонтердар ыстааптарыгар көмөлөрүн аҕаллылар. Университекка баар гражданскай-патриотическай иитии киинин активистара анал байыаннай дьайыыга сылдьар биир дойдулаахтарбытыгар хаххалыыр сиэккэ баайан, блиндажнай чүмэчи оҥорон ыыталлар. Бу сырыыга эмиэ бэйэлэрин илиилэринэн оҥорбут чүмэчилэрин туттардылар.
Яков Горохов, Арктикатааҕы агротехнологическай университет устудьуона: "200 тахса хаххаланар сиэккэ баайан туттардыбыт. 600 тахса чүмэчи оҥордубут. Ону таһынан 2022 сылтан 15 туонна көмө ыыттыбыт".
Күннэтэ "Якутия с тобой" общественнай хамсааһын киинигэр маннык үөрэх кыһаларыттан, тэрилтэлэртэн, биирдиилээн дьонтон анал байыаннай дьайыы кытыылаахтарыгар көмө хомуйаллар. "Үһүс көлүөнэ" оскуола иһинэн үлэлиир "Харысхал" түмсүү кыттыылаахтара анал байыаннай дьайыыга сылдьар уолаттарбытыгар эмиэ бэйэлэрин кылааттарын киллэрэллэр.
Любовь Мескяева, үһүс көлүөнэ оскуолатын "Харысхал" бөлөх кыттыылааҕа: "Ис таҥа, футболка, наскы, жгут, уопсайынан туох наада буолуо диэбиппитин атыылаһан аҕалан туттардыбыт".
Уус Алдан улууһуттан төрүттээх Клавдия Николаева ичигэс флис көстүүм тигэр. Клавдия Андреевна 3 сылын волонтердуур.
Клавдия Николаева, волонтёр: "Тугу эрэ көмөлөспүт киһи диэн баҕа санааттан. 2022 сылга диэри үлэлээбитим, онтон олорбутум. Бу түмсүү баарын истэн манна кэлбитим".
Билигин кииҥҥэ ичигэс таҥаһы-сабы тигэллэр, ону тэҥэ байыастарга наскы, бэрчээккэ, балаклава, термобелье, онтон да атын наадалаах ичигэс таҥас-сап хомуйан ыытыахтара. Маны тэҥэ биирдиилээн дьонтон аадырыстаах баһыылка туталлар.
Анна Ефимова, "Якутия с тобой" хамсааһын бэрэссэдээтэлэ: "150 аадырыстаах баһыылка байыастарга тиийиэҕэ. Аадырыстаах баһыылканы киилэтин да ахсаанын да хааччахтаабаппыт. Онон төрөппүттэр төһөнү баҕар аҕалан туттарыахтарын сөп".
Хаххалыыр сиэккэ баайыыта элбэх түбүгү эрэйэр. Евдокия Григорьева манна кэлэн көмөлөспүтэ балтараа сылтан орто.
Евдокия Григорьева, волонтёр: "Хаххалыыр сиэккэҕэ лиэнтэлэри кырыйан бэлэмниибин. Күҥҥэ олус элбэҕи кырыйабын".
Кииҥҥэ хомуллубут таҥас-сап, баһыылка, гуманитарнай таһаҕас тирэх пууҥҥа тиийэр,онтон салгыы байыаннай чаастарга тарҕанар.