"Намыв" ыстаансыйаҕа саҥа пуун арылынна

Аалай лиэнтэ быһыллан саҥа пууну үөрүүлээх быһыыга-майгыга арыйдылар. Ааспыт сылтан тутуллан саҕаламмыт эбийиэги ситэрэн-хоторон "Ленатран"с тэрилтэ үлэҕэ киллэрдэ. Оттон сакаасчытынан "Саха сирин тимир суоллара" хампаанньа буолар. Тустаах тэрилтэ бу "Намыв" ыстаансыйаны тупсарыыны икки сыллааҕыта саҕалаабыт.

Алексей Местников, "Саха сирин тимир суоллара" тэрилтэ генеральнай дириэктэрин солбуйааччыта: "Сыл саҥатыттан күүскэ үлэлээтибит уонна тутан бүтэрдибит. Анараа кытылга эмиэ бу курдук дьиэлээхпит. Салгын олбохтоох суудунанан сылдьааччылар сылаас толору хааччыллыылаах сиргэ олорон кэтэһэллэригэр анаан".

50 тахса киһини батарар саҥа пуун Аллараа Бэстээххэ баар эбийиэктэн чөкө эрээри хааччыллыытынан хаалсыбат. Олорор устууллар, санузел, төлөпүөн ииттэрэргэ розеткалар барыта көрүллүбүттэр. Сотору кэминэн киириигэ вокзалларга курдук тимир көрдүүрүнэн ааһыы баар буолуоҕа.

"Садҥап пууҥҥа бары усулуобуйа олохтоммут. Саамай сүрүнэ диэн манна сылаас сырдык. Сотору экминэн манна ас атыылыыр лааппылар баар буолуохтара. Икки ааннаах, биир өттүнэн киирэр итиэннэ иккиһинэн суудуналарга тахсар. Маныаха табыгастаах кирилиэс оҥоһуллубут", - Ирена Осипова, корреспондент.

Саҥа пуун арыллыытын, биллэн турар, ордук кэтэспиттэрэ пассажирдар. Степанида Терентьева дойдутугар Мэҥэ-Хаҥаласка айаннаан эрэр. Быйыл салгын олбохтоох суудунанан бастакы сырыыта. Онон ичигэс пууну бастакытын көрдө. Аны таһырдьа тымныыга туран суудунаны кэтэспэт буолбутун үллэстэр.

Степанида Терентьева: "Эрдэ элбэх буолан кэтэһэн турааччыбыт. Оттон билигин олорор сирдээх сылаас дьиэ баара олус үчүгэй. ".

Онон аны мантан инньэ дьон салгын олбохтоох суудунаны Өлүөнэ эбэ икки кытылыттан сылаас дьиэҕэ кэтэһэр буолуохтара. Сотору кэминэн бу саҥа пууҥҥа сылаас аһы атыылыыр лааппы, доруобуйаларыгар хааччахтаах дьоҥҥо анал тырааныспары ыҥырар кнопка баар буолуоҕа. Оттон бэрээдэги көрөр тырааныспар полициятын учаастага номнуо арыллан үлэлии турар.  Пуун сарсыарда 8 чаастан киэһээ 8 диэри аһаҕас туруоҕа.