Кыра эрдэхтэн суол быраабылатыгар үөрэнии
Өйдөөх иниспиэктэр зебра уонна суоппар оҕолорго суол быраабылатын оонньуу быһыылаахтык үөрэтэллэр. Оттон бу Дойду тэбэр сүрэҕиттэн анаан-минээн биһиги Өрөспүүбүлүкэбитигэр "Островок безопасности" диэн ааттаах аһымал пуонда көһө сылдьар тыйаатыра аан бастакытын биһиэхэ ыалдьыттыы сылдьар. Сүрүн сыал-сорук - кыра эрдэхтэн суолга куттал суох буолуутун кыра дьоҥҥо тириэрдии.
Чахчы, оҕолор интириэстэрэ үгүс. 33 оскуола алын сүһүөҕүн үөрэнээччилэрэ болҕомтолоохтук, бэйэлэригэр чугастык ылынан биир тыынынан испиктээҕи көрөллөр. Тутатына олорон, суол быраабылатын үөрэтэлэр. Оттон маннык хабааннаах тэрээһини Өрөспүүбүлүкэтээҕи суолга куттал суох буолуутун хааччыйар иниспиэксийэ маҥнайгытын тэрийэр.
Ирина Ефремова, СӨ суолга куттал суох буолуутун хааччыйар иниспиэксийэ пропаганда салаатын судаарыстыбаннай иниспиэктэрэ: «Биһиги Өрөспүүбүлүкэ Госавтоинспекцията бастакытын “Островок безопасности” диэн благотворительнай поунданы кытта алтынньы ыйга уһуйаан уонна оскуола алын сүһүөх оҕолоругар манна Москваттан наһаа үчүгэй артыыстар кэлэннэр көрдөрөллөр. Бу барыта оҕолорбут суол быраабылаларын үчүгэйдик билэллэригэр, таһырдьа сэрэхтээхтик сылдьалларыгар ананыллар».
"Сэрэхтээх буолуу уруоктара" марафон Дьокуускай куорат үөрэх кыһаларыгар уонна оҕо уһуйааннарыгар ыытыллан баран иһиэҕэ. Холобура, саамай бастакы тэрээһин киин куораппыт 33 оскуолатын бастакы кылааһын оҕолоругар ананан сыанаҕа турда.
Варвара Гоголева, Дьокуускай куорат 33 оскуолатын алын сүһүөх кылаастарын учуутала: «Биһиэхэ олус үчүгэй тэрээһин буола турар. Онно мин маҥнайгы кылаастарбын аҕаллым. Кылааспар 34 оҕолоохпун. Кинилэр олус интириэһиргээтилэр. Маннык кылаас чаастары бэйэбит эмиэ ыытабыт».
Билигин тустаах биэдэмистибэ "Оҕону харыстаа" диэн оперативнай аахсыйатын ыытар, ол чэрчитинэн бу маннык хабааннаах тэрээһиннэр, төрөппүттэри кытары күүстээх үлэ барар. Манна даҕатан эттэххэ, сыл саҕаланыаҕыттан Саха сирин үрдүнэн оҕо кыттыыллаах 90 суол саахала таҕыста, онтон хомойуох иһин 4 о5о сырдык тыына быһынна, 98 оҕо араас таһымнаах эчэйиилэри ыллыллар. Онон бу хайысхаҕа үлэ күүһүрэр.