"Дьокуускай - Аллараа Бэстээх" хайысханан паром сайыҥҥы тарыыбынан бүтэһик күннэрин сылдьар
Бүтэһик парому баттаһа Даркылаахха сырыы субуллан олорор. Суол сабыллыан иннинэ илин эҥээр тутуу матырыйаалын, аһы-үөлү таһыы бү күннэргэ тохтообот. Тоҕо диэтэр аны тохсунньу саҥатыгар диэри сырыы тохтуур, улахан массыыналарга олох да кэлэр сылга диэри.
Эбэ кыдьымахтаммыт. Онон сайыҥҥы тарыыбынан бүтэһик күннэр. Сайын устата 14 паром "Дьокуускай - Аллараа Бэстээх" хайысханан сылдьыбыт эбит буоллаҕына, кэлэр нэдиэлэттэн паром ахсаана аҕыйыа итиэннэ быыһык кэмҥэ олохтоммут тарыыбынан үлэлиэхтэрэ. Манна сыана лаппа үрдүүр.
Холобур, кыра массыыналар 4000 - 12000 солбкуобайга диэри. Оттон таһаҕы тиэйэр көлөлөргө сыана 25000 - 65000 солк. диэри буолар. Манна массыына уһунуттан көрөн тарыып олохтонор. Оптуобустар 15000 - 28000 солк. аннараа кытылы булуохтара. Оттон тыраахтырдарга ыйааһыннарынан сыана быһыллыбыт. 45 000-65 000 солкуобайы биир туорааһыҥҥа төлүөхтэрэ.
Онон хаалбыт күннэри баттаһа дьон-сэргэ дьыалатын үмүрүтэргэ түбүгүрэр. Улахан кыра массыыналар тиһигин быспакка кэлэллэр.
Игорь Созонов: «Бүтэһик сырыыларбытын сылдьабыт, суолбут сотору сабыллара чугаһаата. Алтынньы бүтүүөр диэри паром сылдьыа диэбиттэрэ. Эрэй баҕайы, муоста арылла охсоро эбитэ буоллар үчүгэй буолуо этэ».
Үөһээ этэн аһарыллыбытын курдук, быйыл паром сырыыта эрдэ тохтоото. Ол курдук сорох сирдэргэ 5 күн уруттаата. Өрүс мууһа өссө элбээтэҕинэ сотору кэминэн мууһу хайытар буксирдар тахсыахтара. барыта 3 аал сылдьыаҕа. Манна туһунан тарыып олохтонон турар.
Семен Коркин, СӨ тырааныспар уонна суол хаһаайыстыбатын миниистирин солбуйааччы: «Алтынньы ый 15 күнүгэр Бүлүү бөлөх паромнарын үлэлэрин тохтотон тураллар. Алдан өттүгэр бу нэдиэлэ бүтүүтүгэр дылы сылдьаллара былааннанар. "Дьокуускай – Аллараа Бэстээх" 20 чыыһылаҕа диэри сылдьара былааннанар».
Оттон дьону таһар катердар билигин Речпорт аннынан муустаах буолан, Даркылааҕынан сылдьаллар. Оттон өрүскэ кыдьымах күүскэ киирдэҕинэ салгын олбохтоох ааллар тахсыахтара. Тарыып 2000-2500 солк. саҕаланыа.