Сайын устата өрөспүүбүлүкэҕэ 124 км суол оҥоһулунна

Саҥа оҥоһуллубут Севастопольская суолунан сырыы субуллан олорор. Аспаал үлэтэ түмүктэнэн уулусса номнуо арыллыбыт. Бытархай үлэлэри ситэрии эрэ хаалан турар. Бу төһө да кылгас кээмэйдээх суол буоллар Дьокуускай биир суолталаах уулуссата. Эрдэ икки эрэ балаһалаах буолан Аэропорт диэкки барыыга наар хаайтарыы үөскүүрэ. Онтон билигин Автострадаҕа тахсыыга 3 балаһа оҥоһуллан, сырыы төһө эмэ түргэтээбит.

Севастопольская уулусса устата 900 миэтэрэ. Сүрүн өттө икки балаһалаах, сатыы дьон хаамар сирдээх итиэннэ велосипед суола баар буолбут. Оптуобус тохтобуллара саҥардыллыбыттар. Маны таһынан ардах, хаар уутун сүүрдүү саҥалыы ньыманан оҥоһуллубут.   

Дьулустаан Тартакынов, "Дороги Саха" тэрилтэ  суол учаастагын салайааччы : «Ити уулуссаҕа уу сүүрдэр ситимэ саҥаттан оҥоһулунна уонна үс насоснай станция баар буолар, ууну хачайдаан Курнатовскай күөлүгэр ыытар».

Сайыҥҥы былааннаммыт үлэ ситэн, билигин сүрүннээн суоллары туттарыы барар. Өрөспүүбүлүкэҕэ 124 килэмиэтир аспаалланна. Бу үлэ бүтүннүүтэ "Олоххо-дьаһахха инфраструктура" национальнай бырайыагынан ыытыллар.

Надежда Яковлева, СӨ айан суолун салалтатын оннуттан өрөмүөн салаатын сүрүннүүр инженерэ: «Биэс региональнай суолга: Нам, Умнас, Өймөкөөн, Бөтүн уонна Харбалаах суолларыгар өрөмүөн түмүктэннэ. Ону тэҥэ Өлүөхүмэ уонна Сунтаар оройуоннарыгар саҥардыы кэнниттэн 3 муоста ситиһиилээхтик үлэҕэ киирдэ».

Сыллата суолу саҥардыы үлэтэ Дьокуускайга киэн далааһыннаахтык барар. Быйыл 3 улахан уулусса өрөмүөнэ саҕаланна. Хабаров,ойуунускай уонна Сэбиэскэй Армия 50 сыла уулуссларга үлэ эһиил түмүктэниэ.

Маны таһынан Тускул түөлбэҕэ икки уулусса, Сыырдаах нэһилигэр, Белинского уонна Бестужева уулуссаларга саҥа аспаал тэлгэннэ. Сэргэлээх оройуонугар саҥардыы үлэтэ түмүктэннэ. Онон Дьокуускай суоллара нуормаҕа эппиэтиир таһыма сылтан сыл үрдүүр.

Евгений Григорьев, Дьокуускай куорат баһылыга: «Куораппытыгар 85% суолбут нормативка эппиэттэһэр буолла. Ити улахан көрдөрүү, 2019 сыллаахха национальнай бырайыак саҕаланарыгар суолларбыт 33% эрэ эппиэтиир этэ».

Оттон быйылгы үлэ бу ый бүтүөр диэри үмүрүйүө.