Саха сиригэр сыл саҕаланыаҕыттан 1400-тэн тахса баһаар бэлиэтэннэ

13431 профилактическай кэпсэтиилэри Саха Өрөспүүбүлүкэтин баһаары утары сулууспатын үлэһиттэрэ ыытыллар. Бу барыта "Жилище" аахсыйа 2 түһүмэҕин чэрчитинэн ааста. Бу тэрээһининэн сибээстээн тустаах биэдэмистибэ иниспиэктэрдэрэ ис дьыала уорганнарын, социальнай үлэһиттэри кытары элбэх оҕолоох, соҕотох олорор аҕам саастаах дьоҥҥо итиэннэ профилактическай учуокка турар дьоҥҥо сырыттылар.

Тэрээһин чэрчитинэн АДПИ баһаар бастакы мүнүүтэтиттэн суһаллык тыаһыыр тэрил үлэтин бэрэбиэркэлээтилэр. Билигин Өрөспүүбүлүкэ үрдүнэн уопсайа 3300-тэн тахса буруону сэрэтэр оборуудабанньа иилиллиннэ. Онтон тустаах биэдэмистибэ баһаарынай салаа үлэһиттэрэ 2774 ыалы хаптылар,

Ольга Андреева, СӨ баһаары утары сулууспатын баһаар профилактикатын инженерэ: «Пеледуй бөһүөлэгэр түүн үс чаас ааһыыта икки этээстээх мас дьиэҕэ АДПИ буруоттан үлэлээн кэлэн олохтоохтору тыаһынан уһугуннаран 28 киһи быыһаммыта, ол иһигэр 8 оҕо».

Билигин күн-дьыл уларыйар кэмигэр статистика көрдөрүүтэ лаппа үрдүүр диэн исписэлиистэр биэлиэтииллэр. Бу өрөбүллэргэ Кангалаас түөлбэтигэр букатын иккитэ  баһаарынайдары ыҥыра сырыттылар, онно гараас уонна тимир көлө умайда.

Антонина Ушницкая, СӨ баһаары утары сулууспатын пресс-сулууспатын үлэһитэ: «Саха сирин үрдүнэн алтынньы 12 күнүгэр дылы 1444 баһаар түбэлтэтэ таҕыста. Былырыын баччаҕа 1512 баһаар буолбута. Быйыл хомойуох иһин 38 киһи уокка былдьанна, онтон иккитэ оҕо. 58 киһи араас эчээйиини ылла. Баһаар тахсыбыт сүрүн төрүөттэрэ: оттуллубут оһоҕу көрүүтэ суох хаалларыы, уот ситимин ноҕуруускалааһын уонна уоту сэрэҕэ суох туттуу».

Баһаары умулларардааҕар-сэрэтэр ордук. Профилактическай үлэ хабааннаахтык ыытыллар. Сотору кэминэн "Отопление", "Саҥа дьыл" улахан оперативнай тэрээһиннэр саҕаланыахтара.