"Олоххун уларыт" диэн ускул-тэскил сылдьар дьоҥҥо аахсыйа ыытылынна

Дьиэтэ-уота, үлэтэ-хамнаһа суох ускул-тэскил сылдьар дьоҥҥо көмөлөһөр соруктаах аһымал аахсыйа 2018 сылтан тиһигин быспакка ыытыллар. Бу аахсыйаҕа сылын аайы араас кыһалҕалаах киһи кэлэн көмө көрдүүр. Ол курдук быраастар анализ туталлар, тустаах тэрилтэлэр тус докумуоннара суох сылдьар дьоҥҥо оҥоттороллоругар итиэннэ үлэ буларга тиийэ көмөлөһөллөр.

Сардаана Гурьева, "Урукку дьылларга 60% хаайыыттан тахсыбыт дьон буоллаҕына, кэлин социальнай өттүнэн кыаммат дьон кэлэр буоллулар. Онон биһиги аһымал аахсыйа ыытаммыт, барытын чинчийэн көрөммүт быраап өттүнэн сөптөөх этиилэри киллэриигэ дьулуһабыт".

Галина Баишева аһымал аахсыйаҕа кэлэн көмөлөспүтэ хаһыс да сылыгар барда. Хас биирди кэлбит, көмөҕө наадыйбыт киһини көрсөр, арыаллыыр. Кини бэлиэтииринэн бу аахсыйаҕа ордук дьоно аккаастаммыт,  дьиэтэ-уота суох хаалбыт киһи кэлэрин этэр.

Галина Баишева, Дьокуускайдааҕы ИДьМ бэтэрээннэрин сэбиэтин бэрэссэдээтэлэ: "Кэпсэтэн да көрдөххө, хаайыыга олорон кэлбит дьоннор үлэ булбакка, дьонноругар кыайан чугаһаабакка уулуссаҕа баран хаалаллар. Уонна ол олохторугар үөрэнэн хаалан арахсыахтарын баҕарбаттар".

Бу маннык түгэҥҥэ, олох ыарахан балаһыанньатыгар түбэспиттэргэ көмөлөһөр "Тирэх" киин күүс-көмө буолар. Күн бүгүн 80 миэстэлээх кииҥҥэ 40 тахса тустаах исписэлиис үлэлиир.

Елена Григорьева, "Тирэх" социальнай адаптация киин салаатын сэбиэдиссэйэ: "Биһиги бэйэбит салаабытыгар уйулҕа үлэһиттэрэр бааллар, социальнай исписэлиистэр үлэлэһэллэр, ону тэҥэ медициинскэй көмөнү оҥоробут, манна 400 тахса киһини сылга сытан тахсар. 1 ыйтан сыл аҥаарыгар диэри олоруохтарын сөп ".

Маны таһынан аһымал аахсыйаҕа уопсастыбаннай тэрилтэлэр, түмсүүлэр көхтөөх кыттыыны ылаллар. Биирдиилээн да дьон таҥас-сап, мал-сал, ас-үөл аҕалан туттараллар. Уопсайа аһымал аахсыйа тэриллиэҕиттэн 900 киһи көмө көрдөөбүт, онтон 90 дьиэтигэр төҥнүбүт, олох сырдык суолугар үктэммит.