Булчут билиэтин эксээмэн туттаран ылар буоллулар

Булт билиэтин ыларга аны бу эйгэ сокуонун ылы-чып билиэхтээххин. Саҕалааччы булчуттар аны мантан ыла эксээмэн туттараллар, маныаха билиэттэрин былдьаппыт дьон эмиэ. Маннык улахан уларыйыы бу хайысхаҕа бэрэдээктиир сыаллаах-соруктаах итиэннэ сааһыттар эппиэтинэстээх, быраабыланы, сокуону билэллэригэр туһуланар.

Владимир Решетников, СӨ булт департаменын салайааччыта: «Бастакытын булчут билиэтин ылааччылар биһиэхэ кэлэн эксээмэҥҥэ сайаапка суруйаллар.  Ону туттардахтарына эрэ Госуслуги портан нөҥүө билиэттэригэр сайаапка ыытар кыахтаналлар. Бу сыл саҥатыттан электроннай билиэт диэн киирбитэ».

Сыл саҕаланыаҕыттан бу күҥҥэ диэри уопсайа 2500 кэриҥэ киһи булт билиэттэрин ыллыллар.Тустаах биэдэмистибэ иһитиннэрэринэн, сылга ортотунан  3000-3500 билиэт бэриллэр. Билигин сокуон кыттаатта, урукку кэмнэргэ сайыбылыанньа эрэ суруйан баран докумуоннанан хаалар эбит буоллахха, күн бүгүн булт ирдэбиллэрин булчуттар билиэх тустаахтар.

“Эксээмэн  туттарааччыларга анаан 3 компьютер турда. Хас биирдии киһиэхэ 1 чаас бэриллэр. Онно 100 ыйытыкка эппиэттиэхтээхтэр ”, - Анастасия Добрянцева, корреспондент.

Номнуо бастакы хараҥаччылар манна кэлэн эксээмэн туттардылар. Уопсайа 10 киһи саҥа ирдэбилинэн булт билиэтэннэ диэн үлэһиттэр иһитиннэрэллэр.

Наталья Ушницкая, СӨ булт департаменын сүрүннүүр исписэлииһэ: «Эксээмэммит ыйытыктара барыта Дойду айылҕа харыстабылын министиэристибэтинэн бигэргэммиттэр. Барыта 200 ыйытыы баар. Биирдии ыйытыкка 1 мүнүүтэ бэриллэр. Онтон биһиһи өрөспүүбүлүкэбит киэнигэр 100 ыйытыы. Онтон 75% сөпкө эппиэттээбит буоллахтарына туттарбытынан ааҕыллаллар».

Булт билиэтин ылыахтаах хандьыдааттар эрдэттэн киирэн бэлэмнэнэллэригэр эксээмэн боппуруостара барыта Саха өрөспүүбүлүкэтин экология министиэристибэтин саайтыгар арыллыччы көстөр. Эксээмэни Дьокуускай куорат Курашов аатынан уулусса 30/1 дьиэтин, 2 этээһигэр туттарыахха сеп.