Өлөөҥҥө кыыл табаларга кэтиир тэриллэри ииллилэр

Бу көстөр каадырдарга бырайыагы олоххо киллэрээччи Иннокентий Слепцов уонна Касьян Новгородов Өлөөн эбэҕэ дьиикэй табалар оруобуна маассабайдык көһөр кэмнэрин иилэ хабан, ошейник кэтэрдэллэрин көрөҕүт. Биологическай ресурсалар дирекциятын үлэһиттэрэ уопсайа Өлүөнэ уонна Өлөөн хайысхатыгар сылдьар 5 табаҕа научнай сыаллаах моойдоругар оборуудабанньалары кэтэттиллэр.

Иннокентий Слепцов, СӨ биологическай ресурсалар, ураты харыстанар айылҕалаах сирдэр уонна аан айылгылар дирекциятын булт салаатын салайааччыта: «Уунан уста сылдьар кэмнэригэр моонньуларыгар ииллибит. Балтараа сылга болдьохтоох ииллибит. Бу кэм устата ханан сылдьалларын кэтии олоруохпут».

Чахчы билигин спутник нөҥүө исписэлиистэр иилиллибит ошейникатаах дьиикэй табаларын кэтии олорор. Барыта арылхайдык манна көстөр, холобур, төһө бириэмэ хаампыта, сүүрбүтэ, аһаабыта анал «Аргос» бырагыраамаҕа көстө турар. Ошейник "Квазар" диэн ааттаах Москва учуонайдарын чиничийиилэрин түмүгэ буолар. Табаларга 1,5 сыл болдьохтоох иилилиннэ.

Касьян Новгородов, СӨ биологическай ресурсалар, ураты харыстанар айылҕалаах сирдэр уонна аан айылгылар дирекциятын сүрүннүүр исписэлииһэ: «Кыыл табалар Өлөөн өрүһү туоруулларын кэтэһэн туран, мотуордаах тыынан устан киирэн оҕуурдаан тутаталаан ииллибит. Кыратык хойутаатыбыт, онон кэтэһиилээх-манаһыылаах буолла. Кэлиибитигэр кыдьымаҕынан устан кэллибит».

Оттон бу бырыайак  сүрүн сыала-соруга Өлөөн диэки түөлбэлээн сылдьар дьиикэй табалар сырыыларын үөрэтии буолар. Номнуо бастакы дааннайдар бааллар.

Иннокентий Слепцов, СӨ биологическай ресурсалар, ураты харыстанар айылҕалаах сирдэр уонна аан айылгылар дирекциятын булт салаатын салайааччыта: «Бу кэтиир тэрил таба сыҕарыйыытын көрдөрөр. Манна хайа баҕар кэми талан көрүөххэ сеп. Холобур, икки нэдиэлэтээҕи, ыйдааҕы, сыллааҕа диэн кэтиир кыах баар буолла”.

Оттон манна даҕатан этэр эбит буоллахха, дойду президенын грааныгар уопсайа 1 мрд солкуобай үп көрүллүбүтэ, оттон Россия үрдүнэн 164 бырайыак грааҥҥа тиксибитэ, онтон алтата биһиги өрөспүүбүлүкэбититтэн. Онтон үһэ биологическай ресурсалар дирекциятыттан.

«Бырайыагы олоххо киллэрээччилэр иһитиннэрээччилэр этэллэринэн, ахсынньы ый саҥатыгар мииринэй оройуонугар өссө эбии иилиллиэхтэрэ», - Анастасия Добрянцева, корреспондент.