Георгий Бессонов төрөөбүтэ 110 сылыгар быыстапка турда

Олох уонна Үлэ Дьоруойа диэн ааттаммыт быыстапка саха норуотун биир чулуу, дэгиттэр киһитигэр Георгий Евдокимович Бессонов олоҕун кэрэһэлиир. Быйыл кини төрөөбүтэ 110 сыла. Кини чаҕылхай, киэҥ нэһилиэстибэлээх олоҕо, уһулуччу суолталаах үлэтэ күн бүгүнүгэр диэри үтүө холобур буолар. Георгий Евдокимович аата үөрэҕирии ситимин историятыгар кыһыл көмүс буукубанан суруллубута.  

Лидия Уварова, Георгий Бессонов үөрэнээччитэ, СӨ үөрэҕириитин үтүөлээх үлэһитэ: "Мин киниэхэ 5-6 кылаастарга үөрэнэ сылдьыбытым. Ботаниканы уонна зоологияны биэрэр этэ. Уонна аҕыйах кэмҥэ юннаттыы сылдьыбытым “тыыннаах муннукка”. Онон Георгий Евдокимович мин учуутал уонна киһи буолан тахсарбар бэйэтин суолун хаалларбыт киһи".

Георгий Евдокимович 1935 сылаахха Тойбохойго Саха сиригэр аан бастакытын тыыннаах муннугу, онтон оскуолатааҕы кыраайы үөрэтэр аан бастакы музейы аспыта, итиэннэ 1957 сыллаахха өрөспүүбүлүкэҕэ ботаническай саады тэрийбитэ.

Игорь Николаев, СӨ үтүөлээх юрист: "Муус болгуо дойдуга аан бастаан ботаническай саад тэриллэн, соҕуруу эрэ дойдуга үүнэр мастар үүнэн тахсаллара киһи кыаҕа муҥура суоҕун көрдөрбүтэ".

Быыстапка үөрүүлээх аһыллыытыгар ыҥырыылаах ыалдьыттарынан Сунтаар улууһун Тойбохой нэһилиэгин олохтоохторо, Георгий Бессонов чугас дьоно буоллулар. Хас биирдии киһи эҕэрдэ тылыгар кини үйэлээх үлэтин ахтан-санаан ааста. Онтон саамай бэлиэ түгэнинэн Георгий Бессонов чугас дьоно кини тус архыыбын музей пуондатыгар бэлэх уунан хараллыыга анаатылар.

Анна Шишигина, Саха музейын дириэктэрин солбуйааччы: "Биһиги наһаа үөрэбит. Анна Георгиевна аҕатын туһунан өр сылларга мунньубут матырыйаалларын биһиэхэ харайыыга биэрдэ".

Георгий Бессонов кэргэнинээн Ксения Алексеевналыын 10 оҕону төрөтөн, атахтарыгар туоруорбуттара. Оҕолоро бары олох араас эйгэтин үлэһиттэрэ буола үүммүттэрэ.

Анна Бессонова, Георгий Бессонов кыыһа, педагогическай үлэ бэтэрээнэ: "Биһиги аҕабыт олоҕо дьоруойдуу быһыылаах. Кини бар дьон биһирэбилин ылыах тустаах. Биһигини аҕабыт иитэн улаатыннарбытыттан киэн туттабыт".

Георгий Бессонов 110 сылыгар анаммыт быыстапка сэтинньи ый саҥатыгар диэри үлэлиэҕэ.