Ил Дархан олохтоох бэйэни салайыныы уорганнарын сэбиэтин сүбэ мунньаҕын салайан ыытта
Олохтоох бэйэни салайыныы сэбиэтин сүбэ мунньаҕын Ил Дархан Айсен Николаев саҥа талыллыбыт улуус баһылыктарын билсиһиннэрииттэн саҕалаата. Өрөспүүбүлүкэ Уһук Илиҥҥэ эрэ буолбакка бүтүн дойдуга инники күөҥҥэ сылдьыытыгар олохтоох бэйэни салайыныы уорганнарын быһаччы өҥөтүн бэлиэтээтэ. Мунньахха 3 сүрүн боппуруос көрүллэр. Олортон биирдэстэрэ быыбар. Ил Дархан "Быһа эфирыгар" эппитинэн икки таһымнаах былаас хаалар. Манна улахан уларыйыылар баһылыгы талыыга киириэхтэрэ.
Степан Саргыдаев, Чурапчы улууһун баһылыга, СӨ олохтоох бэйэни салайыныы эбиэтин бэрэссэдээтэлэ: «Баһылыгы талыыга Ил Дархан киллэрбит представлениетынан кандидатуратын оройуон дьокутааттара талар буолуохтара. Дьокутааттар эппиэтинэсэтэрэ сүрдээҕин үрдүөҕэ диэн. Федеральнай сокуон өрөспүүбүлүкэбитигэр киириитэ Ил Түмэн дьокутааттарынан бигэргэниэҕэ».
Иккис улахан боппуруоһунан анал байыаннай дьайыыга кыттыылаахтарыгар уонна кинилэр дьиэ кэргэттэригэр психологическай көмөнү оҥоруу көрүлүннэ. Бу хайысха миэстэтигэр былааннаахтык оҥоһуллуохтааҕын ыйдылар. Үлэ хайдах барыахтааҕын дьүүллэстилэр.
Степан Кузьмин, Амма улууһун баһылыга: «Туох көмөлөр баар буолуохтаахтарын ырытыһаммыт, инникитин дьоҥҥо хайдах көмөнү оҥоруохтаахпытын сүбэ-мунньах. Биһи улууспутугар анал хамыыһыйа баар психологическай көмө өттүнэн. Байыаннай чаастарынан командировкалааммыт, дьоммут онно баран күүс-көмө, өйөбүл буолан кэлбиттэрэ».
Олохтоох бэйэни салайыныы мунньаҕар инвестиция килиимэтин туругун ырытыстылар. Оттон инвестицияны тардыыга төрдүс сылын Горнай улууһа бастаата. муниципальнай рейтинг 30 көрдөрүүттэн турар, итинтэн 15 ыйытыгынан. Бастаабыт улууска 1 мөлүйүөн солкуобай кээмэйдээх олохтоох бүддьүөтү өйүүргэ эбии дотация көрүлүннэ.
Никита Андреев, Горнай улууһун баһылыга: «Төрдүс сылын Горнай улууһа бастыкы миэстэҕэ тигистибит. Улууспут урбаан үлэһиттэрбиттэригэр махталбын тириэрдиэхпин баҕарабын. Улуус хамаандатын үлэтин түмүгэ диэн сыаналыыбын».
Сэбиэт мунньаҕар турбут боппуруостары олоххо киллэрии - бэйэни салайыныы сүрүн соруктарыттан биирдэстэрэ.