Алтынньы маҥнайгы күнүгэр аҕам саастаах дьон күнүн бэлиэтиибит

Бу курдук сиһилии тутан-хабан маастардар хас биирдии кэлбит дьону кыбытык тигиитигэр үөрэтэллэр. Варвара Иннокентьевна аҕам саастаах дьоҥҥо анаммыт декадаҕа куруук кыттар, маастар-кылаас ыытар.

Варвара Цыпандина, "Школа третьего возраста" түмсүү уһуйааччыта: «Лоскутное шитье по-японски диэн тиэхиникэ. Эргэ таҥастары туһаҕа таһаарабыт. Дьоннор интириэһиргииллэр. Таҥас-сап тиктэллэр».

Киин куоракка үгэс быһыытынан Уһун үйэлэниигэ диэн пуорум ыытыллынна. Тэрээһиннэ хас да былаһаакка үлэлээтэ. Тустаах исписиэлиистэр аҕам саастаах дьон үлэ буларыгар, кылгас болдьоххо анал куурска үөрэнэллэригэр сүбэ-ама биэрдилэр, быраастар хас да хайысханан үлэлээтилэр. Итиэннэ уопсастыбаннай хамсааһыннар, түмсүүлэр бу сыллар устата үлэлээбит ситиһиилэрин, олоххо кииллэрбит бырайыактарын кэпсээтилэр.

Надежда Петрова, волонтёр: «Биһиги бырайыактарынан үлэлиибит. Салайааччыбыт Валентина Васильевна “Сомоҕолоһуу” диэн бырайыактаах. Сылга биирдэ үлэбит түмүгүнэн “бал” ыытабыт. Аҕам саастаах дьоннор буолан дьарыктанабыт: иистэнэбит, ону-маны оҥоробут. Аҕам саастаахтарга олус туһалаах».

Саха сиригэр Аҕам саастах дьон күнэ киэн далааһыннаахтык саҕаланна. Үгэс быһытыынан хас улуус, уокурук аайы декада чэрчитинэн кэнсиэрдэр, куонкурстар, семинардар уонна да атын интэриэһинэй тэрээһиннэр ыытыллаллар. 

Вильям Иванов, СӨ бэтэрээннэрин Сэбиэтин бэрэссэдээтэлэ: «Киһи олоҕо уһуохтаах, киһи үчүгэйдик олоруохтаах. Ити этиини биһи Ил Дархаммыт уонна Арассыыйа Президенэ Владимир Путин этэн тураллар. Ону биһи батыһаммыт үлэбитин оннук хайысханнан ыытабыт уонна бырабыытылыстыба көмөтүнэн маннык тэрээһиннэри ыытабыт».

Маны таһынан декада чэрчитинэн туһалаах семинардар, конференциялар ыытыллыахтара. Өрөспүүбүлүкэ салалтата, тустаах үлэһиттэр, сынньанар, доруобуйаны чөлүгэр түһэрии кииннэргэ, итиэннэ кыаммат кырдьаҕастарга дьиэлэригэр тиийэн көмө оҥоруохтара, эҕэрдэлиэхтэрэ.