Үҥкүү тыйаатыра 46-с айар дьылын саҕалаата
Сергей Зверев - Кыыл Уола аатынан Үҥкүү тыйаатыра саҥа сезону арыйаар. Тыйаатыр 46-с сезона ураты уонна улахан суолталаах буолар. Быйыл Кыыл Уола үбүлүөйдээх 125 сыла. Онон саҥа сезону Сергей Зверев 1943 сыллаахха суруйбут олоҥхотунан "Кынчарҕаннаах харахтаах кырыылаах сутуруктаах Кыыс Кыдаан бухатыыр" диэн ураты испиктээкилинэн арыйыаҕа. Манна тыйаатыр бары артыыстара кытталлар, туруорааччы режиссер Сергей Потапов буолар.
Эдуард Жирков, С.А. Зверев - Кыыл Уола аатынан национальнай үҥкүү тыйаатырыгар сүрүн хореограф: "Сергей Потапов курдук режиссеру кытта үлэлиир олус интэриэһинэй. Бу испиктээкилбит олоҥхо. Олоҥхону биһиги аныгы өттүнэн көрдөрдүбүт".
Сайыына Каратаева үҥкүү кэрэ эйгэтигэр оҕо сааһыттан уһуйуллан улааппыта. Бу саҥа сезоҥҥа кини сүрүн оруолу оонньуур, онон олус долгутулаах уонна эппиэтинэстээҕин этэр. Бу туруорууга өссө саас бэлэмнэнэн саҕалаабыттар, ол иннини сүүмэрдээһини ааспыттар.
Сайыына Каратаева, С.А. Зверев - Кыыл Уола аатынан национальнай үҥкүү тыйаатарын артыыһа: "Сорудах биэрэ этэ. Ол онно хаһыытыыр, сүүрэкэлиир этибит. Онно тутта-хапта сылдьарбытын, тута хоһуйуубутун көрөр этэ. Ким да итинник сүүмэрдээһини оҥорбот этэ. Ордук саҥарарбыт биһиэхэ ыарахан этэ".
Испиктээкил устата Кыл Саха төрүт дорҕоон бөлөх - саха төрүт иснтруменнарынан оонньоон, тыаһы-ууһу таһааран, саха тэтимин биэриэҕэ.
Анна Томская, СӨ үтүөлээх артыыһа, "Кыл Саха" төрүт дорҕоон бөлөх салайааччыта: "Олоҥхону атыннык көрөөһүн диэн. Уруккуну уонна билиҥҥини холбоон көрдөрөөһүн. Ырыанан доҕуһуолун Александр Константинов диэн Нерюнгри киһитэ оҥорбута. Ол үрдүнэн биһиги, “Кыл саха” бөлөх, төрүт үнүстүрүмүөннэргэ оонньуубут, оттон Олоҥхо тыйаатырын артыыстара олоҥхону толоруохтара".
Саҥа туруоруу дьикти көстүүлээх, дириҥ ис хоһоонноох буолуоҕа. Билигин артыыстар, айар бөлөх тохтоло суох бэлэмнэнэ сылдьаллар.
"Үҥкүү тыйаатыра 46-с айар дьылын киэҥ далааһыннаахтык арыйаары сылдьар. Ол курдук “Кыыс Кыыдаан” испиктээкилинэн Саха тыйаатырыгар арыйыаҕа. Ол кэннэ Россия куораттарынан айанныаҕа", - Ирина Гольдерова, корреспондент.
Ол курдук Үнкүү тыйаатыра балаҕан ыйын 24-25 күннэригэр Былатыан Ойуунускай аатынан Саха тыйаатарыгар ураты испиктээкили сүрэхтиэҕэ ол кэннэ бэстибээллэргэ кытта барыаҕа.
Саргылаана Борисова, С.А. Зверев - Кыыл Уола аатынан национальнай үҥкүү тыйаатарын дириэктэрэ: "Испиктээкил аан дойдутааҕы премьерата алтынньы 5 күнүгэр Санкт-Петербург куоракка 35 аан дойдутааҕы тыйаатыр бэстибээлин арыйыаҕа. Бу испиктээкилинэн 3 национальнай өрөспүүбүлүкэнэ гастроллуу барыахпыт".
Онон бүгүн, сарсын Үнкүү тыйаатыра - көрөөччүлэрин долгуйа күүтэр.