Саха сирин киин өттүгэр аны сылыйыы кэллэ

Үһүс күнүн Дьокуускай куорат хаары кытта охсуһар. Эмискэ балаҕан ыйыгар үлүгэрдээх элбэх сөҥүү үллүктээн коммунальщиктарга үлэ күөстүү оргуйар. Түүннэри күнүстэри дьон сылдьар сирдэрэ бастатан туран ыраастанар. Аны түүнүн тоҥорор буолан уу сүүрэр хоруулара мууһуран күчүмэҕэйдэри үөскэтэр.

Ньургун Федоров, "Жилкомсервис" тэрилтэ үлэһитэ: "Кумах бөҕө киирэрэ, онон уу хаайтарар". 

Онон куорат хаһаайыстыбатын бэрийээччилэригэр ураты күһүн буолла. Хаары, ууну, бадарааны, мууһу кытта тэҥинэн ыраастыыр. Маннык күн-дьыл өтөрүнэн буола илигин үлэһиттэр этэллэр.

"Түспүт хаар утары уулла турар. Онон ууну оботторууга улахан күүс ууруллар. Куоарт хаһаайыстыбатын үлэһиттэрэ өрөл күннэртэн саҕалаан күн аайы 500 кууп ууну оботтороллор", -  Мария Дмитриева

Күнүһүн күүскэ ириэрэр, түүнүн тоҥорор буолан киэһэ сарсыарда халтараан үөскүүр. Маннык халлаан турда эрэ эчэйии көрдөрүүтэ тута тахсар. Номнуо халтарыйан охтооччулар көрдөрүнүүлэрэ элбээбит.

Хаарчаана Ильин, Өрөспүүбүлүкэтээҕи 2№-дээх балыыһа травматолог бырааһа: "Эмискэччи халтараан буолан ааспыт сууккаҕа 125 киһи эчэйэн кэллэ. Онтон 20 тахсата халтырыйан охтубуттар".  

Эрдэ түспүт хаары күнү-дьылы кэтээн көрөөччүлэр Красноярскай кыраайтан сис былыт аҕалбытын этэллэр. Бу күннэргэ өрөспүүбүлүкэ бүттүүнүгэр күүстээх сөҥүүлээх. Муҥутаан 23 сантымыатыр халыҥнаах хаар түстэ. Бу сис былыт нэдиэлэ устата Саха сирин улуустарынан халыйыа. Бүлүү бөлөх, Дьааҥы оройуоннарыгар хаары үллүктүө. Маннык халлаан өссө күүстээх тыаллаах буолуо диэн гидромет сулууспа иһитиннэрэр.

Саргылаана Никитина, : "Нэдиэлэ ортотугар Монголияттан сылаас салгын маассата киирэн, киин уонна соҕуруу улуустарга биллэ сылыйыа. Ол эрэн өрөбүл күннэргэ эмиэ тымныйыаҕа. Инчэҕэй хаар тыал түһүөҕэ, халтараан буолуо". 

Күнү-дьылы кэтээн көрөөччүлэр этэллэринэн бу хаар ойуурга ууллууо суоҕа, дьон сылдьар сирдэригэр эрэ ириэ. Онон быйыл кыһыммыт эрдэ кэллэ диэххэ сөп.