Сунтаар Элгээйитин саҥа балыыһата 10 нэһилиэги хабан үлэлиир

Амбулатория сүрэҕэ, быраастар да олохтоохтор да ордук күүппүттэрэ саҥа аныгы лаборатория буолар. Тустаах кабинет бары ирдэбилгэ эппиэттиир үрдүк хаачыстыбалаах аныгы аппараттарынан хааччылынна. Манна бары кэриэтэ анаалиһы тутар буоллулар.

Октябрина Семёнова, Элгээйитээҕи амбулатория лаборана: "Араас анализтары оҥорор аппарааттар кэлэн үлэлэтэ турабыт. Аны сотору кэминэн ИФА ньыманан аналиһы оҥорор буолуохпут. Чугас нэһилиэктэртэн кэлэн туттарллар, онон элбэхтэр".

Оттон бу УЗИ хоһо. Манна эмиэ эрдэ суох аныгы аппарат үлэлиир. Онон ыарыһахтар ис уорганнарын туругун бүтүннүү көрдөрөр кыахтаннылар. Бу курдук хас биирдии хос үрдүк хаачыстыбалаах тэрилинэн хааччылынна. Биллэн турар мантан ордук үөрэллэр олохтоохтор. Эльгээйи төрүт олохтооҕо аҕам саастаах Прокопий Степанович Акимов доруобуйатын көрдөрүнэ сылдьар. Өр кэтэспит балыыһалара арыллан үөрүүбүт үгүс диэн үллэстэр.

Прокопий Акимов, Элгээйи олохтооҕо: "Курат балыыһаларыттан туох да итэҕэһэ суох. Бары оборуудабанньа барыта баар. Дьиэтэ билиҥҥи медиссиинэ ирдэбилигэр сөп түбэһэр. Олохтоохтор аһары үөрэ астына сылдьабыт".

Саҥа амбулатория күнүскү өттүгэр сытар эмтэнэр хостоох. Уопсайа 10 палаталаах. Ол иһигэр аҕам саастаахтарга ураты болҕомто уурулунна.

"Элгээйи амбулаториятын сүрүн уратытынан гериатрия салаата буолар. Толору хааччыллыылаах 5 куойкалаах палааталарга аҕам саастаахтар туһааннаах көмөнү ылаллар", -Ирена Осипова, корреспондент.

Тустаах амбулаторияҕа Элгээйи эрэ буолбакка чугас эргин 10 нэһилиэк олохтоохторо бары көрдөрүнэллэр. Маныаха халыҥ уочарат диэн суох. Бары электронно талон ылан бириэмэнэн кэлэн көрдөрөллөр.

Светлана Конобулова, Элгээйитээҕи амбулатория сэбиэдиссэйэ: "Күҥҥэ 37 киһини көрөр кыахтаахпыт. Ону таһынан икки күнүскү куойкалаахпыт. Онтубутугар күн аайы кэлэн эмтэнэллэр. Ыйга ортотунан 50 киһи эмтэнэр".

Тустаах амбулатория "Доруобуйа харыстабыла" национальнай бырайыак чэрчитинэн үлэҕэ киирбитэ. Ааспыт сыл ахсынньы ыйыгар аанын тэлэччи арыйбыта. Уонна бу 9 ый көрдөрүүтүнэн номнуо 9 тыһ кэриҥэ киһи көрдөрбүтэ бэлиэтэннэ. Маны тэҥэ лабораторияҕа  12 тыһ тахса анаалиһы чинчийдилэр. Диспансеризацияны 403 нэһилиэк олохтооҕо ааста. Онон тустаах амбулатория арыллан олохтоохтор үрдүк хаачыстыбалаах медиссиинэ өҥөтүн туһаналлар.