Саха сиригэр 4-с норуоттар икки ардылынааҕы библиогеографическай конгресс түмүктэннэ

4-с норуоттар икки ардыларынааҕы библиогеографическай конгресс түмүктэннэ.  Конгресска кыттааччылар сүрүннээн билиҥҥи аныгы кэмҥэ култуурнай нэһилиэстибэни чөл хаалларыыга санааларын эттилэр, библиотека үлэтин ситимин өссө сайыннарыыга туох үлэ ыытыллыахтааҕын кэпсэттилэр.

Афанасий Ноев, СӨ култуура уонна духуобунай сайдыы миниистирэ: “Олус элбэх ыалдьыт кэллэ. Аҥаардас бу кэпсэтиилэргэ Дьокуускай куоракка 100 тахса киһи кэллэ. Олор истэригэр наука дуоктардара, хандьыдааттара уонна библиографтар мустаннар хайдах сайдабытый уонна аҕааччыбытыгар туһалаах матырыйааллары оҥоробутуй диэн ырыттылар”.

Национальнай библиотека олох сайдыытын тэтиминэн тэҥҥэ уонна инники хардыылыыр. Дойду таһымыгар оҥоруу өйү киллэриигэ бастыҥ саҕалааччы буолар. Онон бу хайысха конгресс сүрүн кэпсэтиитэ уонна арыйыыта буолла.

Юрий Семёнов, СӨ маҥнайгы президенэ М.Е. Николаев аатынан "Николаев - киин" салайааччыта: “Оҥоһуу өй сайдар кэмигэр библиотека ону хайдах сөпкө туттан үлэлиэхтээҕин, идэҕэ ханнык халыыптары, уларытыылары киллэрэн бэлэм буолуохтаахпытын ырыттыбыт. Национальнай библиотека исписэлиистэрэ күүстээхтик үлэлии олороллор диэн, бу кини уопутун Россияҕа, аан дойдуга тарҕатыахха наада диэн эттилэр”.

Быйыл библиотека искусственнай интеллект таҥыытын түмүктээн үлэҕэ киллэрдэ.  Бырайыак биэс хайысханы хабар. Бу хайысхалары конгресс кэмигэр сиһилии кэпсээн элбэх сэҥээриини ылан, инникитин бииргэ үлэлэһэргэ элбэх этиилэр киирдилэр.

Яна Чыбыева, норуоттар икки ардыларынааҕы библиогеографическай конгресс экспертэ: “Конгресс кыттааччылара Россияҕа бастакынан оҥоһуу өйү туһанаҕыт диэн эттилэр уонна олус соһуйдулар,  интэриэһиргээтилэр.  Ононт ити уопуту тарҕатыахха наада диэтилэр”.

Конгресска барыта 100-тэн тахса кыттааччы уонтан тахса былааһаакканан үлэлээтэ. Манна төгүрүк остуоллар, аһаҕас кэпсэтиилэр, маастар-кылаастар буоллулар. Кыттааччылар, ыалдьыттар конгресс үрдүк таһымнаахтык ааста, билиини-көрүүнү кэҥэттэ диэн санааларын үллэстэллэр.

Валентина Брежнева, норуоттар икки ардыларынааҕы библиогеографическай конгресс экспертэ: “Национальнай бибилиотека ураты көстүү. Ыраах тайа сытан эрэ биһиги идэбитигэр оҥоһуу өй киинэ буолла. Библиотека бу хайысхаҕа оҥорон таһаарыыта уратылар, бириэмэни ситэн иһэр ситиһиилэр”.

Национальнай библиотека быйыл үбүлүөйдээх 100 сылын бэлиэтиир. Онон бу конгресс үбүлүөйдээх сыл биир сүрүн тэрээһинэ буолла.