Дьокуускай эргин тыаны баһаар кэннэ чөлүгэр түһэрии

Саҥа улаатан эрэр бэрдьигэстэри сэрэнэн саҥа үүнүөхтээх сирдэригэр уурталыыллар. Манна хас да сыллааҕыта уот сиэн ааспыт сиригэр  хаттаан саҥа олох саҕаланыа. Бэс оҕолорун икки ардын чопчу арыттаахтык, хас биирдии эрээти чуолкайдык учуоттаан олордоллор.

Бүгүҥҥү сорук 20 суотай сиргэ 500 бэрдьигэһи олордуу. Маныаха мастары уот линията ааһар сириттэн түөрэн аҕалбыттар. Онон кэрдиигэ барыахтаах бэстэр саҥа сиргэ көстүлэр.

Алексей Анисимов, аахсыйа кыттыылааҕа,  Дьокуускай олох-дьаһах коммунальнай хаһаайыстыбатын сүрүн энергетига: «Ханан хойуутун, убаҕаһын көрөбүт уонна оннук курдук хотутун, арҕаатын булан эрдэ үүммүтүн курдук олордобут».

Исписэлиистэр этэллэринэн билигин маһы олордууга саамай табыгастаах кэм. Баччаларга олордоҕуна силис тардыыта ордук буолар. 

Андрей Яковлев, аахсыйа кыттыылааҕа, АГАТУ ойуур комплексын уонна сири таҥастааһын факультетын деканын билим үлэтигэр солбуйааччы: «Дьааматыгар олордон баран сүрүнэ кытаанахтык таптайан биэриэххэ наада. Хойуут күһүн олордууга уу кутуллубат».

 "Ойууру харыстыахха" аахсыйа быйыл 7 сылын ыытыллар. Бу кэм устата барыта 33 тыһыынчаттан тахса маһы олортулар. Маны сэргэ ойууру чөлүгэр түһэрии национальнай бырайыак чэрчитинэн былааннаахтык ыытыллар. Манна Саха сирэ дойдуга бастакы миэстэ.

Сахалина Ефремова, Ойуур харыстабылын департаменын исписэлииһэ: «Быйыл өрөспүүбүлүкэҕэ былааммыт туолан эрэр. Барыта 5500 га олордуллуохтаах. Билигин 4000 таҕыста».

Сыллата аахсыйа кэҥиир. кыттар тэрилтэлэр ахсааннара элбиир. Ону тэҥэ билим үлэһиттэрин сыһыарыы тэрээһин суолтатын дириҥэтэр, ойуур хаһаайыстыбатыгар исписэлиистэри иитэн таһаарыыга көҕүлүүр.   

Мария Слепцова, АГАТУ ойуур комплексын уонна сири таҥастааһын факультетын декана: «Сыалбыт-сорукпут – эдэр ыччаты ойууру көрөн-харайан, харыстаан үүннэрэн, инники көлүөнэлэргэ хаалларарга ситиһэбит. Исписэлиистэри ойуур хаһаайыстыбатыгар тардаммыт үлэлиирбит улахан туһалаах».

Ойууру харыстыахха аахсыйа өрөспүүбүлүкэ үгүс улуустарыгар ыытыллар.