Доруобуйаларыгар хааччахтаах оҕолору үөрэтэр, сайыннарар саҥа киин үөрэх дьылын саҕалаата

Оҕолор сатабыллаахтык туттан-хаптан оҕуруот аһын быһаллар. Бу домоводство уруога. Учууталлара салайыытынан кинилэр битэмииннээх фантазия салааты бэлэмниэхтээхтэр. 

Лидия Сибирякова, Адаптивнай киин домоводство уруогун учуутала: «Бэйэлэрэ улаатан баран салгыы үөрэнэллэригэр дьиэҕэ-уокка диэн уонна 9 кылаас кэннэ техникумҥа баран поварга үөрэниэхтэрин сөп».

Адаптивнай үөрэх кыһатыгар дуальнай үөрэхтээһин бырагыраамата киирэн, маныаха аналлаах тупсаҕай усулуобуйалаах  кылаас хостор оҥоһуллубуттар.  Онон манна туой буортан оҥоһукка, парикмахер, фотограф, иистэнньэҥ, ас астааччы курдук идэлэри эбии үөрэхтээһининэн баһылыахтаахтар.

Оттон бу музыка уруога ыытыллар.

Музыка алыптаах дорҕооно оҕолору уоскутар, кинилэри ырыа куттаах  уһуйааччы кэрэ эйгэтигэр киллэрэр. Бүгүн ийэ туһунан ырыаны үөрэтэллэр.

Оттон бу дефектолог дьарыга. Ааҕарга үөрэтииттэн саҕалаан оскуолаҕа араас  исписэлиистэр ыалдьар оҕолору сайыннарарга бары кыһамньыларын уураллар. Маныаха улахан болҕомто оҕолору улахан олох суолугар бэлэмнээһин.

Ольга Адамова, Адаптивнай киин дириэктэрэ: «Биһиги оскуолабыт уратыта диэн – коррекционнай үөрэхтээһин буолар. Ол курдук, биһиги психика өттүнэн задержкалаах оҕолору ылабыт. Оскуолабытыгар сүрдээх элбэх исписэлиистэр үлэлииллэр. Хас биирдии кылааска тютор уонна ассистент баар буолар».

Өр күүтүүлээх улахан тутуу - адаптивнай оскуола дьиэтэ быйыл балаҕан ыйыгар үлэҕэ киирбитэ. Арыллыы үөрүүлээх түгэнэ барыларыгар да долгутуулаах этэ. Манна уһуйаан, олорор интернат эбиллэн биир тиһилик  буолуохтаах. Оттон билигин төрөппүттэр да оҕолор да саҥа үөрэх дьылын тупсаҕай усулуобуйаҕа саҕалаатылар. Бастакы улахан тэрээһин көмүс күһүн дьаарбаҥката буолла.

Раиса Иванова, Адаптивнай киин алын кылааһын учуутала: «Төрөппүттэри кытта оҕолор дьиэлэригэр эрдэттэн бэлэмнэнэн, ийэлэрин кытары оҥорбуттарын аҕалан манна туруораллар. Ыарыһах оҕоҕо наһаа үчүгэй коллекция буолар».

Маанылаах остуолга оҕолор бэйэлэрэ уруок кэмигэр оҥорбут фантазия салааттара эмиэ болҕомтоҕо киинигэр туруоҕа.