Саҥа үөрэх үлэ дьыла саҕаланан бу кэмҥэ суол саахалын ахсаана элбиир
ГАИ инспиэктэрдэрэ икки көлүөһэлээх тимир көлөнөн сылдьааччыларга өссө биирдэ туһаайан суол быраабылатын быһаараллар. Билигин халлаан өссө да сылаас турар, онон самокатынан, электросамокатынан, билисипиэтинэн айаннааччы суолга толору. Маныаха үксүлэрэ суол быраабылатын тутуспаттар. Ордук суолу туоруурга көлөттөн түспэккэ айаннаан туорууллар диэн инспиэктэрдэр бэлиэтииллэр.
Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ инспиэктэрэ: «Оҕолор сэрэхтээх буолуохтарын наада, электросамокат сүрдээх улахан оскуорастаах. Элбэх киһи баар сиригэр оскуораһын кыччатыахтаах, эбэтэр сатыы сылдьыахтаах диэн сэрэтэбит. Сыл саҕаланыаҕыттан куоракка 6 суол саахала бэлиэтэммитэ, онно биир 17 саастаах оҕо араас эчэйиилэри ылбыт».
Оттон оҕолорго суол быраабылатын туһунан бастатан туран төрөппүттэр кэпсиэхтээхтэр. Сокуоннай сааһын ситэ илик оҕо бу самокаттарынан, бэлисипиэтинэн уонна да атын икки көлүөһэлээх тимир көлөнөн сылдьан суол саахалын кыттыылааҕа буоллаҕына бастатан туран төрөппүт эппиэтинэһэ буолар. Аҥардас бу сыл саҕаланыаҕыттан өрөспүүбүлүкэ үрдүнэн 90 тахса оҕо кыттыылаах суол саахала бэлиэтэннэ.
Ирина Ефремова, СӨ суолга куттал суох буолуутун хааччыйар иниспиэксийэ пропаганда салаатын судаарыстыбаннай иниспиэктэрэ: «Сыл саҕаланыаҕыттан Саха сирин үрдүнэн статистика көрдөрөрүнэн оҕо кыттыылаах суол саахала 94 таҕыста. Онно сүүстэн тахса оҕо араас эчэйиилэри ылла уонна хомойуох иһин 3 оҕо тыына быһынна. Үксүн подростоктар матасыыкылынан сылдьан улахан суол саахалыгар түбэһэннэр тыыннара быһынна. Ол курдук, Намҥа, Хатаска улахан суол саахаллара таҕыстылар».
Бу кэмҥэ оҕо эрэ кыттыылаах буолбакка, итирик туруктаах суоппардар кыттыылаах үгүс суол саахала тахсар.
Күн бэҕэһээ, Ньурба улууһугар итирик туруктаах суоппар көҥүллэммэт кыһыл уокка айаннаан иннигэр баран испит массыынаны кытта харсыспыт. Ол кэннэ аны сатыы хаман иһэр дьахтары үнтү көппүт. Салгыы өссө парковкаҕа турар массыыналарга тиийэн түспүт. Туһааннаах быһылаанынан билигин бэрэбиэркэ ыытыллар. Бэлиэтээн эттэххэ, бу сыл 8 ый көрдөрүүтүнэн өрөспүүбүлүкэҕэ итирик туруктаах суоппардар кыттыылаах 75 суол саахала бэлиэтэммит, манна 10 киһи сырдык тыына быстыбыт.