Быйыл уомул хайа да сыллаҕар өлгөмнүк таҕыста

Балыгы тутар сыахха үлэ тохтоло суох барар. Уомул муораттан эмискэ киирэн, быйыл ураты балыктааһын буолла. Хаһан да маннык элбэх көмүс хатырыктааҕы биир кэмҥэ хаптара иликтэрэ.

Сууйуу-сайҕааһын кэннэ балыктары тоҥорууҥа бэлэмнииллэр. Маннык сэттэлии  устуука гына уурталыыллар итиэннэ 40 кыраадыс тымныылаах холодильниктарга угаттыыллар. Хайа баҕар балык 2.5-3 чаас иһигэр  кылыгыраччы тоҥор.

 Зо Лин Ли, "Булуҥ" хаһаайыстыба үлэһитэ: "Манна үлэ ыарахан, ол эрэн сатаатахха чэпчэки. Балык арааһыттан тохтоло суох кэлэр. Сүрүннээн уомул, тууччах, чыыр, сордоҥ. Биригээдэбитигэр уончабыт".

Быйыл хаһаайыстыба тоҥоруу үлэтин бастакытын бэйэтэ толору ыытар. Уопсайа балыгы астыыр 3 улахан станциялаахтар. Манна тута тоҥоруу сыахтара уонна булуустар бааллар.

Руслан Лукин,  "Булуҥ" хаһаайыстыба салайааччыта: "Быйыл барытын бэйэбит тоҥордубут. Маннык балыкка өссө да бэлэмэ суох эбиппит дии саныыбын. Тоҕо диэтэр өссө да күүскэ балыктыахпытын харайар сирдэрбит туолан хаалаллар. Ол иһин сөп соҕустук балыктаатыбыт. Этэҥҥэ 200 туонаттан тахсаны балыктаатыбыт. Оттон билигин Күһүүргэ балыктыы сылдьабыт".

"Булуҥ" хаһаайыстыба маннык брикеттааһыны туһаммыта быданнаата итиэннэ балыгы өр харайыыга саамай табыгастаах ньыматын ыйар. Тоҥоруллубут көмүс хатырыктаахтары бу курдук 18 киилэлээх куулларга угаттаан, атыыга бэлэмнииллэр. Кумааҕыттан оҥоһуллубут хас да хостоох суу салгыны киллэрбэт, балык амтанын уларыппат.

Роман Хочойонов, АГАТУ устудьуона: "Булуҥ” хаһаайыстыбаны кытта АГАТУ дуогабар баттаһаммыт балыкка үлэҕэ кэлбиппит. Бу иннинэ Сахалиҥҥа тутар этэрээтинэн балыгы астааһыҥҥа сылдьыбытым. Манна эмиэ Сахалиҥҥа курдук тута тоҥорор оборуудабанньа баарыттан соһуйдум".

Уомул быйыл уонтан тахса күн олох күүскэ киирдэ. Онон сыахха үлэ түүннэри-күнүстэри тохтообото. Бу кылгас кэм иһигэр хаһаайыстыба 200 туоннаттан тахса уомулу хаптаран, сууйан-сотон тоҥордо. Уопуттаах балыксыттар хаһаайыстыба сыллата сайдарын, хааччыллыы кэҥиирин астына бэлиэтииллэр.

Егор Попов, "Булуҥ" хаһаайыстыба балыксыта: "Ааспыкка рефрижератор кэлэн сыахтан балыкпытын тиэйэн барда. Онон сыахпыт босхолонно. Билигин онтубутугар балыктыыбыт. Сыах баар буолан абыранныбыт".

Булуҥ сибиэһэй уомулун тиэммит бастакы уу ааллара номнуо киин куоракка кэллилэр. Ол аата эбэ өлгөм бэлэҕэ  Саха сирин олохтоохторугар атыыга таҕыста.