Булуҥҥа көмүс хатырыктаах өлгөмнүк кэллэ

Бу сырыыга эбэ көмүс хатырыктааҕыттан өлгөмнүк бэристэ. Илими тартах аайы күлүмнээн олорор. Атырдьах ыйын ортотугар балык дьэ охсон балыксыттар санаалара тахсан сылдьар.

Көрүөх бэтэрээ өттүгэр тыы сип сибиэһэй үрүҥ балыгынан туола  түһэр. Муҥутаан биир сырыыга 600 тахса устуука кэлэр. Бу олох үчүгэй көрдөрүү.

Виктор Попов, "Булуҥ" хаһаайыстыба балыксыта: "Атырдьах ыйын 10 күнүн диэки оҕуста, олус элбэх балык. Нэдиэлэ иһигэр үчүгэйдик балыктаатыбыт. Туонналыы, 2 туонналыы туттара сырыттыбыт".

"Булуҥ" хаһаайыстыба  уопсайа 17 звенону сайыҥҥы балыкка тэрийдэ. 150 тахса киһи кылгас кэм иһигэр былааны толорууга түбүгүрэллэр. Тоҕо диэтэр балык тахсар кэмэ олус кыра. Аны быйылгы күн-дьыл уратылаахтык ааһан эрэр.

Егор Попов, "Булуҥ" хаһаайыстыба балыксыта: "Быйыл уубут улахан, хаһан да маннык буолбатаҕа. Олох сааскы уунан турар. Ол да буоллар балыкпыт бара турар, бу күннэргэ арыычча намыраата. Халламмыт ардыыр, тыалырар. Тыалбыт кыайда быйыл дьэ. Ол да буоллар балыктыы сылдьаллар уолаттар, иҥнибэттэр". 

Балыксыттар от ыйыттан биир күнү көтүппэккэ эбэҕэ тахсаллар, биир  да  биэс  да көмүс хатырыктаах хаптын илимнэрин түһэрэллэр. Бу барыта уомул муораттан тахсыытын мүччү туппат туһугар. Бу көрүҥ балыкка хаһаайыстыба быйыл 245 туонна былааннаах. 

Руслан Лукин, "Булуҥ" хаһаайыстыба салайааччыта: "Уомул тахсыытын кэтэһэммит күүскэ балыктааммыт 200 тахса туоннаны ыллыбыт. Бэйэбит кыахпытынан тоҥорон, түүннэри-күнүстэри балыгы астааһын үлэлээн этэҥҥэ балыктаатыбыт. Билигин да Күһүүр нэһилиэгэр уонна Сииктээххэ балыктыы сылдьаллар ". 

"Булуҥ" хаһаайыстыба балыктааһын тиһигин сөпкө наардаан үлэни тэрийэр. Ол курдук манна хас биирдии киһи эппиэттээх үлэтин чып курдук толорор. Күннээҕи былыгы туһунан биригээдэ көрсөр.

Айаал Никифоров, "Булуҥ" хаһаайыстыба үлэһитэ: "Кытылтан балыгы тиэйэбит. Биир звено быһа холуйан 300-400 киилэ балык аҕалар күҥҥэ. Уопсайа күҥҥэ 7-9 туоннаны тутабыт".

Онтон бултаммыт балык хас да түһүмэхтээх сууйуу, наардааһын кэннэ тоҥоруллан, сайыҥҥы уу суолунан киин коуракка кэлэр. Уомулга былаан туолла, аны халлаан тымныйда эрэ күндүөбэйгэ түһүнүөхтэрэ.