Ил Дархан Татарстааҥҥа үлэлиир

Ил Дархан Айсен Николаев бу күннэргэ Татарстаан өрөспүүбүлүкэтигэр үлэлээтэ. Казань куоракка Татарстаннааҕы Нефтегазохимическай форумҥа кыттыыны ылла. Мунньахха гаас уонна ниэп бырамыысыланнаһыгар уларыйыылары, кыһалҕалары, инникитин бу эйгэ өссө сайдарыгар туох үлэ ыытыллыахтааҕын торумнаатылар. Форумҥа аан дойдуттан барыта 600-тэн тахса бэрэстэбиитил кыттар.

Форум чэрчитинэн Ил Дархан Айсен Николаев Татарстан өрөспүүбүлүкэтин Раиһын Рустам Миннихановы кытта көрүстэ. Көрсүһүүгэ бары эйгэҕэ бииргэ үлэлэһиини бөҕөргөтүүнү уонна сайыннарыыны кэпсэттилэр.

Көрсүһүү түмүгэр Дьокуускай куорат уонна Нижнекамскай куората икки ардыларыгар доҕордоһуу сыһыаннарын олохтуур туһунан меморандумҥа илии баттастылар. Мантан ыла Саха Сирэ уонна Татарстаан биир ситимнээхтик өссө күүскэ үлэлэһиэҕэ.

Үлэ хаамыытынан Айсен Николаев Татарстааҥҥа Саха сирин историятын,  үгэстэрин кэпсиир быыстапканы арыйда. Бу быыстапкаҕа Емельян Ярославскай аатынан Саха түмэлэ баай историялаах экспонаттарын,  Өрөспүүбүлүкэ Судаарыстыбаннай пуондатын күндү таастарын көрдөрүүгэ туруорда. Саха сирин ураты быыстапката Татарстааҥҥа балаҕан ыйын бүтүөр диэри үлэлиэҕэ.

Айсен Николаев, СӨ Ил Дархана: "Олус элбэх боппуруос  инвестицияны көҕүлээһиҥҥэ нолуокка чэпчэтиилэри киллэрии, сир баайын хостооһуҥҥа саҥалыы көрүүлэри туһаныыга. Бары тэҥҥэ сөптөөх суолу тобулуохпут дии саныыбын".

Маны таһынан Айсен Николаев салалтатынан "Энергетика" хайысхаҕа Россия Федерациятын Судаарыстыбаннай сэбиэтин мунньаҕа ыытыллынна. Бу форум Арассыыйа ньиэбин, гааһын салаатыгар ыытыллар норуоттар икки ардыларынааҕы сүрүн тэрээһиннэриттэн биирдэстэрэ буолар.