Аан дойдутааҕы бокса күнүгэр чаҕылхай киирсиилэр буоллулар

Бокса бырааһынньыга чаҕылхай маастар кылаастан саҕаланна. Кырачаан боксердарга дьарыгы ааттаах-суоллаах спортсменнар ыыталлар. Саха сирин биир бастыҥ боксера Василий Егоров улахан спортан баран билигин үүнэн эрэр көлүөнэҕэ баай уопутун үллэстэр, сүбэ-ама биэрэр. Күн бүгүҥҥэ диэри олоҕун аргыһа оҥостубут көрүҥүн сайдыытыгар сүрэҕинэн-дууһатынан ыалдьар.

Василий Егоров, боксаҕа Россия спордун үтүөлээх маастара: “Сылтан сыл эдэр оҕолор боксаҕа киирэллэрэ элбээн иһэр. Ону көрөн киһи астынар. Боска диэн ыарахан көрүҥ. Күүскэ дьарыктаныахха наада уонна рингэҕэ тахсан бэйэ бэйэни кытта охсуһуохха наада. Ол быыһыгар ыйааһын түһэрэҕин, эчэйии ылаҕын. Элбэх ыархаттары ааһан чемпион буолаллар”.

Бокс ханнык баҕарар спорт көрүҥүн курдук эмиэ түһүүлээх-тахсыылаах,уустук көрүҥ. Ол эрэн, манна киһи эт-сиин эрэ өттүнэн буолбакка, толкуйдуур дьоҕура күүскэ сайдар. Онон оҕо кыра сааһыттан дьарыктанан саҕалаатаҕына дэгиттэр сайдыылаах буолар. Саха сиригэр кэнники сылларга бу көрүҥ таһыма өссө үрдээтэ, үгүс оҕо дьарыктанар буолла. Манна төһүү күүс биллэн турар оҕо спордун оскуолалара уонна чааһынай кулууптар.

Нурсултан Халыкбаев, боксаҕа Россия спордун маастара, тренер: “Биһиги кулууппутугар 100 тахса оҕо дьарыктанар. Билигин бу үөрэх дьылыгар саҥа суруйтарыы барар. Хайа баҕар таһымнаах оҕону ылабыт. Бу көрүҥ билигин маассабай буолла, дьарыктаныан баҕалаах элбэх. Мин оҕо сааспын санаатахха, чааһынай кулууптар суохтар этэ. Билигин чааһынай кулууптара, спорт оскуолалара сайдаллар. Онон күрэстэһии үрдүк”.

Бу киирсиигэ тустаах кулууп икки иитиллээччитэ кытынна. Биирэ хотторуу хомолтотун биллэ, иккиһэ кыайыы амтанын амсаһыйда. Уопсайа 5 киирсии буолла. 3 паара оҕолорго уонна икки улахан дьоҥҥо. Маннык тэрээһини киин куорат дьаһалтата уонна бокса федерацията ааспыт сылтан ыытар. Сыллата көрөөччү-сэҥээрээччи элбээн иһэр диэн бэлиэтииллэр.

Алексей Индеев, СӨ бокса федерациятын салайааччыта: “Ыытыллар тэрээһиннэринэн, кулууптар, оскуолалар арыллалларынан көрдөххө бу көрүҥ сайдар, эдэр уолаттар кэлиилэр элбэх. Быйылгы улахан күрэхтэһиилэрбит бүттүлэр. Эһиил өрөспүүбүлүкэ уонна дойду чемпионаттара күүтэллэр”.

Онон бокса аан дойдутааҕы күнүн Саха сиригэр үгүс киһи бэлиэтээтэ. Эдэриттэн эмэнигэр тиийэ кэлэн киирсиилэри көрдүлэр, кырачааннар маастар-кылааска кытыннылар, сатабылларын сайыннардылар.