Саха сиригэр арбуз үгэннээн ситэр кэмэ саҕаланна

Сиппит-хоппут арбуһу үлэһиттэр миэстэтигэр быһан көрөллөр. Тустаах бааһынай хаһаайыстыбаҕа икки суорт бу көрүҥ арбуһу олордоллор. Ол курдук, Крисби уонна Шуга деликато диэн. Бу Саха сирин усулуобуйатыгар үчүгэйдик үүнэллэр эбит.

"Бигиһи усулуобуйабытыгар Шуга деликато диэн суорт табыллан үүнэр. Саамай эрдэ ситэр көрүҥ. Онон бу суорду хомуйан саҕалаатылар. Бу арбуз кыһыл хараҥата өҥнөөх, холбуһах быһыылаах буолар", - Ирена Осипова, корреспондент.

Быйыл сайыммыт сөрүүн буолан үүнүү соччото суох. Ол эрэн бу ахсааҥҥа эрэ охсубут, оттон хаачыстыбата мантан мөлтөөбөтөх. Арбуз сүмэһиннээх, минньигэс.

Алексей Ний, бааһынай хаһаайыстыба салайааччыта: "Сайыммыт тымныы буолан арбуз хомуура саҥа саҕаланна. Эрдэ от ыйын бүтүүтэ ситэр этилэр. Тымныы кэмнэргэ бүрүйэр матырыйаалы 3-4 сайын устата туһана сырыттыбыт".

Күҥҥэ бу бааһынаттан 200 киилэ кэриҥэ арбуһу хомуйаллар. Тутатына чугастыы турар дьаарбаҥкаҕа атыыга таһаараллар. Манна олохтоох арбузтан саҕалаан кукурузаҕа тиийэ баар. Киин куорат олохтооҕо Мария Петрова дьиэ кэргэнинээн бу дьаарбаҥкаттан сыл ахсын сибиэһэй оҕуруот аһын, фруктаны хото ылаллар.

Мария Петрова, Дьокуускай куорат олохтооҕо: "Олохтоох оҕуруот аһа сибиэһэй буолар. Оҕурсуну, помидору ылабыт уонна арбуз баар буоллаҕына эмиэ олохтооҕу атыылаһабыт".

Оттон бу дьаарбаҥканы таһынан олохтоох сибиэһэй оҕуруот аһа бааһынай ырыынагар эмиэ хото атыыга тахсар. Билигин ордук оҕурсуу, помидор, сүбүөкүлэ, моркуоп уонна хортуоска элбэх. Чугастыы эҥэр улуустартан итиэннэ куорат эргин бөһүөлэктэртэн киирэр.

Мирослава Васильева, атыыһыт: "Үксүн Тулагыттан ылабыт. Хортуоскабыт Булгунньахтаахтан уонна Табаҕаттан кэлэр. Сыанабыт ортотунан. Хаһаайыстыбалар хайдах сыанаҕа туттаралларыттан".

Онон бу бааһынай ырыынагар уонна Намныыр суол 13 килэмиэтиригэр баар дьаарбаҥкаттан  кэлэн амсайарга, тууһуурга, хаһаанарга олохтоох оҕуруот аһын хото атыылаһыаха сөп. Балаҕан ыйын бүтүөр диэри ким наадыйарын ылынан, кыстыкка толору хаһаастаах үктэниэҕэ.