Өймөкөөҥҥө иккис халаан кэннэ чөлүгэр түһэрии үлэтэ хаттаан салҕанар
Сивцевтар дьиэлэрин бастакы уу олох улаханнык ылбыта. Дьиэ кэргэн айылҕа алдьатыытын кэннэ, олорор сирэ суох буолар кутталламмыта. Билигин Амма улууһуттан кэлбит биригээдэни кытта көмөлөөн үлэ үмүрүйэн эрэр. Дьиэни бүтүннүү көтөхтөрөн, лүөскэлэрин, акылаатын уларыттылар. Муоста саайа сылдьаллар, алын өттүгэр хара муоста тэлгэппиттэр.
Руслан Смирников, Амма улууһун биригээдэтин салайааччы: "Өймөкөөн нэһилиэгэр кэлбиппит ый буолара чугаһаата. Бүтэһик күннэрбитигэр, бу Сивцевтар дьиэ кэргэҥҥэ үлэлии сылдьабыт. Уустук кэмҥэ көмөлөстүбүт диэн бэйэбит үөрэбит, олохтоох дьон даҕаны үөҕрдүлэр ини диэн эрэллээхпит".
Амма биригээдэтэ Өймөкөөн нэһилиэгэр 14 итиэннэ Хара тумулга 1 ыалга дьиэлэрин чөлүгэр түһэриигэ көмөлөстүлэр. Кыстык ыгар, аны иккис уу кэлэн эмиэ үлэни атахтыыр. Онон ууттан эмсэҕэлээччилэргэ бу курдук көмө олус суолталаах. Барыта 15 улуустан биригээдэлэр кэлэн үлэлээтилэр. Итини сэргэ Хотугулуу-Илин федеральнай университет устудьуоннара туора турбатылар.
Алексей Федотов, Өймөкөөн улууһун баһылыгын бастакы солбуйааччы: "Икки ыалга икки саҥа дьиэ тутуута саҕаланан эрэр, 4 кыбартыыралаах дьиэ тутулла турар. Маны таһынан 117 дьиэҕэ көмө үлэтэ барда. Дьон сэргэ нэһиилэ дьиэтин куурдунан окко тахсыбыт кэннэ, уу үрдээн оттоммут оту эмиэ илдьэ барар. Ол иһин тиэйии боппуростара күүскэ сытыырхайан турар. Онон тыа хаһаайыстыбатын министиэристибэтин кытта уунан сырыы сабыллыар диэри от тиэйиитин быһаарыстыбыт".
Кырдьык, икки төгүл кэлбит халаан оттуур сирдэри күүскэ алдьатта. Кээһилээх уонна охсуллубут от ууга былдьанна. Итини сэргэ ходуһалар ууга сыталлар. Ону ол диэбэккэ олохтоохтор күннэтэ төһө кыайалларынан сүөһү кыстыгар бэлэмнэнэллэр. Күн бүгүн улуус 750 туонна оттоох. Сорох сирдэргэ тыынан эрэ тиийэр кыах баар. Онон окко олох уустук дьыл буолла. Бу кыһалҕаны быһаарар сыаллаах оройуон салалтата билигин улуустарынан хаһаайыстыбалары кытта дуогабардаһар.
Вячеслав Гарильев, СӨ ТХМ үүнүү уонна материальнай-техническай хааччылыы департаменын салайааччы: "Авансирование барыан наада, улуус өттүттэн эмиэ үбүлээһин көрөн олороллор. Бастакы төлөбүр кэннэ хамсааһын саҕаланыаҕа. Өрөспүүбүлүкэ өттүттэн үбүлээһини ааҕына олоробут. Кыстыгы туоруулларыгар Өймөкөөн улууһугар тыһыынчаттан тахса туонна атын улуустартан тиийэн наада".
Өймөкөөн улууһуттан 89 окко наадыйааччы сайаапка киллэрбит мантан 69 кэтэх хаһаайыстыбалаах дьон. Былаан быһыытынан оту тиэйии аны биир нэдиэлэнэн саҕаланыа.