АГАТУ ипподромугар аан бастакы Уһук Илин таһымнаах сүүрдүү буолла

Аттар түстүлэр. 1600 миэтэрэҕэ биир тыҥааһыннаах киирсии. Манна 3 үөһээ саастаах ыраас хааннаах сүүрүүк аттар кытталлар. Уопсайа 4 сыспай сиэллээх бастыыр иһин сүүрдэ. Онтон саамай уопуттаахтара уонна саастаахтара Ньурба улууһун аатын көмүскүүр Деленджер ат иннин кимиэхэ да биэрбэтэ. Жокей Максим Александров Деленджерга эрэлэ улахан этэ. Маныаха өссө икки сыспай сиэллээҕи сүүрдэр.

Максим Александров, ат сүүрдээччи: "Уопсайа түөрт аттаахпыт. Билигин сүүрдэр аттарым биирэ 3 саастаах, биирэ 4-тээх итиэннэ 7-лээх. Биир саҥа аттаахпыт. Бу сайын 3 саастаах сылгы кэлбитэ. Билигин саҥа кэлии аттарга сүүрээри турар".

Уопсайа 8 сүүрдүү буолла. Биир ураты күрэхтэһии бээгэй акка олорсон оҕолор сүүрдүүлэрэ. Тустаах күрэх аан бастакытын ыытылынна. Үүнэн эрэр көлүөнэни сыспай сиэллээххэ сыһыарыы итиэннэ ат спордугар угуйар сыаллаах.

“АГАТУ ипподромугар ат сүүрдүүтүн бырааһынньыга буолла. Сүүрдүүнү таһыһан “Импульс” кулууп иитиллээччилэр ат үрдүгэр олорон эрэ оҕунан ытан көрдөрдүлэр”, - Ирена Осипова, корреспондент.

Историяны сэгэтэн ыллахха, АГАТУ ипподрома Дьокуускайга бастакы ипподром буолар. Манна аан маҥнайгы ат сүүрдүүтэ өссө 1935 сыллаахха ыытыллыбыт. Ол кэмтэн ыла үйэ кэриҥэ бириэмэ ааста, тыһыынчанан сүүрдүүлэр буолбуттара, бастакы чемпионнар бу суолтан тахсыбыттара.

Леонид Владимиров, Саха судаарыстыбаннай тыа хаһаайыстыбатын академиятын 1997-2016 сс. ректора, учуонай, биология наукатын доктора: "Билигин АГАТУ, ипподром, тыа хаһаайыстыбата уонна ат сүүрдүүтүн култуурата арахсыспат өйдөбүллэр буоллулар.  Онон билиҥҥи ректор, биһиттэн эстафетаны ылан, өссө үчүгэйдик тэрийдэ. Араас бириис барыта баар. Дербины тилиннэрдилэр, урут биһиги Уһук Илини сүүрдэр этилэр, быйыл эмиэ икки регионтан кэллилэр. Олох үчүгэй дии".

Оттон Саха сиригэр ат спордун сайыннарыыга улахан кылаатын киллэрбит киһинэн Моисей Гидальевич Пупко буолар. Кини 50-с сылларга бу ипподромҥа үгүс күрэхтэһиини, ат сүүрдүүтүн тэрийбит. Бэйэтэ тренер уонна уолаттарын эмиэ ат спордугар сыһыарбыта. Бу тэрээһиҥҥэ кини уола Владимир Моисеевич Пупко ыҥырыылаах ыалдьыт буолан кэлэн олорор. Кини билигин Москва бастыҥ ипподромугар үлэлиир.

Владимир Пупко, норуоттар икки ардыларынааҕы кылаастаах ат сүүрдээччи: "Бүгүн манна кэлэн олорорбуттан олус диэн үөрэбин уонна киэн туттабын. Сахалар диэн куруутун сылгыны кытта ыкса сибээстээх норуот. Дьөһөгөй  оҕотун суолтата улахан. Саха сылгытын боруодата киэҥник биллэр уонна ахсаан быһыытынан Россияҕа саамай элбэх".

Онон Саха сиригэр ат спорда өссө да сайдар кэскиллээх. Сыллата араас саҥа ыраас хааннаах боруода сүүрүүк аттар эбиллэн иһэллэр. Оттон ипподромҥа саҥардыы үлэтэ ыытыллар. Билигин аны атын көрүҥ ат спордугар холонор сыал-сорук турар.