"Якутлесресурс" тэрилтэ маһы көһөрөр тиэхиньикэ күлүүһүн тутта
Күөх лиэнтэлээх күлүүһү үөрүүлээх быһыыга-майгыга экология миниистиригэр туттардылар. Саҥа баараҕай тиэхиньикэни өрөспүүбүлүкэҕэ "Сбер" тэрилтэ биэрдэ. Саҥа тиэхиньикэни туттарыы үөрүүлээх тэрээһинигэр Ил Дархан Айсен Николаев кыттыыны ылла. Кини "Якутлесресурс" тэрилтэ үлэһиттэригэр сыралаах үлэлэрин иһин, ол иһигэр баһаары умулларыыга, ойууру чөлүгэр түһэриигэ киллэрэр кылааттарыгар махтанна. Уонна бу тиэхиньикэ салгыы үлэлэрэ өссө таһаарылаах буоларыгар күүс көмө буолуо диэн эттэ.
Тустаах тиэхиньикэ Саха сирин усулуобуйатыгар аан бастакытын үлэлиэҕэ. Бу куорат, тыа сирин эйгэтин тупсарыыга биир дьоһун хардыы буолар.Быйылгыттан саҕалаан "Якутлесресурс" тэрилтэ үлэһиттэрэ тимир көлөнү кытта үлэлииргэ үөрэниэхтэрэ. Маныаха сыал-сорук туруоруллан күһүҥҥүттэн туһанан көрүөхтэрэ.
Виктор Омуков, "Якутлесресурс" судаарыстыбаннай автономнай тэрилтэ генеральнай дириэктэрэ: "Саҥа уопут буолар, ол иһин дьону үөрэтиэхтээхпит бу тиэхиньикэҕэ. Итиэннэ күһүн үлэлэтэн көрүөхтээхпит".
Тустаах тиэхиньикэ атын дойдуларга хамаҕатык туһаныллар. Кытай дойдута оҥорон таһаарбыт көлөтө буолар. Оттон Саха сиригэр, ирбэт тоҥҥо бастакы холонуу буолуоҕа
"Тустаах тиэхиньикэ ирбэт тоҥ устулуобуйатыгар аан маҥнайгытын үлэлиэҕэ. Маннык тэрилинэн номнуо сиппит-хоппут мастары ойууртан, питомниктан тууран аҕалан куораты көҕөрдүүгэ туһаныахтара", - Ирена Осипова, корреспондент.
Тиэхиньикэ маһы биир-биир силиһин алдьаппакка тууран ылан улахан прицептаах массыынаҕа сүөкүүр. Оннук хас да маһы тиэйэн илдьэн, аны бэйэтэ ылан атын сиргэ олордор. Онон ойууру харыстааччыларга улахн көмө буолар.
Николай Горохов, "Якутлесресурс" тэрилтэ ойууру чөлүгэр түһэриигэ салаатын сүрүннүүр инженерэ: "Пааркаларга мээнэ бэрээдэгэ суох үүнэн турар мастары биир эрээт гына көһөртөөн олордууга туһаныахпыт.Мас олордуу уустук, оттон бу тиэхиньикэ ылла да көһөрөр".
Даҕатан эттэххэ, Саха сиригэр эрэ буолбакка бүтүн аан дойду үрдүнэн кэнники сылларга ойууру чөлүгэр түһэриигэ, көҕөрдүүгэ ураты болҕомто ууруллар буолла. Онон сыллата баай тыаны харыстыыр сыаллаах араас тэрээһиннэр тиһигин быспакка ыытыллаллар, итиэннэ туһааннаах тиэхиньикэнэн хааччыллыы эмиэ тохтообот.