Үөрэх эйгэтин үлэһиттэригэр атырдьах ыйынааҕы мунньах саҕаланна

Бу күннэр устата үөрэх эйгэтин үлэһиттэрэ хас да былаһаакканан үлэлиэхтэрэ, үөрэҕирии систиэмэтин сайыннарыыга туһуламмыт боппуруостары дьүүллэһиэхтэрэ. Маны таһынан сүбэ мунньах чэрчитинэн бу сыллар устата айымньылаахтык үлэлээбит учууталларга наҕараадалары туттардылар.

Наталья Петровна Парфенова үөрэх эйгэтигэр үлэлээбитэ 45 сыл буолла. Кини саха тылын учуутала. Бу сыллар устата элбэх оҕону үөрэтэн-такайан кэллэ. Сыралаах үлэтин сыаналаан үрдүк наҕараада туттарбыттарыгар үөрэн турар.

Наталья Парфёнова, В.В. Филиппов аатынан Бэрдьигэстээхтээҕи гимназия саха тылын уонна литературатын учуутала: "Оҕону аҥаардас биир эрэ өттүнэн такайбакка, олох араас бары хайысхатыгар үөрэтиэххэ наада".

Атырдьах ыйынааҕы мунньахха үгэс быһыытынан өрөспүүбүлүкэ бары улуустарыттан тыһыынчаттан тахса үөрэх эйгэтин үлэһиттэрэ мустан, саҥа үөрэх дьылын ырытыһаллар, саҥа сүүрээннэри киллэрэргэ этиилэри киллэрэллэр. Быйылгы сүбэ мунньахха сүрүн кэпсэтиинэн оҕону иитиигэ, патриотическай өйдөбүллэри чиҥэтиигэ уонна үөрэх хаачыстыбатын үрдэтиигэ болҕомто ууруохтара.

Нюргуна Соколова - СӨ үөрэх уонна наука миниистирэ: "Саҥа экономикабыт сайда турар кэмигэр, биһиэхэ манна хайдах хайысхалар ирдэнэллэринэн үөрэхтээһиҥҥэ киирэ тураллар. Ол туһунан мүбэ мунньахха кэпсэтиилэри ыытыахпыт".

Мунньах чэрчитинэн үөрэх кыһалара, оҕо уһуйааннара бу сыл устата ситиспит үлэлэрин көрдөрүүгэ туруордулар, уоппуттарын атастастылар. Быйылгы тэрийээччилэр быйылгы атырдьах ыйынааҕы сүбэ мунньаҕы сонун уонна ураты ыытар былааннаахтар.

Ил Дархан Айсен Николаев саҥа үөрэх дьылын көрсө үөрэх кыһаларыгар саҥа автобус күлүүһүн туттарда. Барыта 13 оскуола саҥа көлөлөннө.

Амма улууһун 1№-дээх орто оскуолата эмиэ бу күн саҥа автобус күлүүһүн тутта. Үөрэх кыһата улууска саамай улахан оскуоланан уонна элбэх үөрэнээччилээҕинэн биллэр.

Юрий Шишигин, В.Г. Короленко аатынан Амматааҕы 1-кы №-дээх орто оскуола дириэктэрэ: "Араас хайысхалаах күрэхтэргэ, тэрээһиннэргэ, олипиадаларга барар кыахтара кэҥээбитинэн оҕолорбутун, учууталларбытын эҕэрдэлиибин. Бу оптуобустар кыһыҥҥы аналлаахтар диэн кэллилэр. Бу биһиги тыйыс усулуобуйаҕа олорор дьоҥҥо олус табыгастаах. Онон түгэнинэн туһанан өрөспүүбүлүкэ, улуус салалтатыгар махталбын биллэрэбин".

Оҕо билиҥҥи кэмҥэ киэҥ билиилээх, бары өттүнэн сайдыылаах буоларын ситиһэргэ сөптөөх усулуобуйаны тэрийиини өрөспүүбүлүкэ салалтата инники күөннэ тутар. Сылын аайы саҥа оскуолалар, оҕо уһуйаанын эбийиэктэрэ тутуллан үлэҕэ киирэ тураллар. Онон кэлэр кэнчээри ыччат саҥа хардыылара, бииртэн биир үрдэллэрэ сайдыы суолун тутуоҕа.