Дьокуускайга анал байыаннай дьайыы кыттыылаахтарын дьиэ кэргэттэригэр ас астааһыныгар маастар-кылаас буолла

Колледж куукуната оҕо саҥатынан туола түстэ. Саҥаны билиэн-көрүөн баҕалаах кырачааннар ийэлэригэр үөрүүнү кытта көмө буолаллар. Хас да остуолунан тэҥҥэ ас астанар.  Бу курдук тэрээһиннэри Аҕа дойдуну көмүскээччилэр дьиэ кэргэттэрин кэмитиэтэ тиһигин быспакка ыытар.

Галина Вырдылина, маастар-кылаас кыттыылааҕа: "Кэмитиэккэ өйөбүллэрин иһин уонна маннык дьоҥҥо-сэргэҕэ таһаартыылларын, анал байыаннай дьайыы кыттыылаахтарын дьиэ кэргэттэрин кытта алтыһыннаралларын иһин улахан махтал. Тоҕо диэтэр кыһалҕалаах кэмҥэ киһи бэйэтигэр бүгэн хаалар, онон маннык тэрээһиннэр олус суолталаахтар".

Аҕа дойдуну көмүскээччилэр дьиэ кэргэттэрин кэмитиэтэ тэриллибитэ 3 сыла. Түмсүү үгүс улууһу хабар. Бу курдук тэрээһиннэртэн, мас-муус киллэриииттэн саҕалаан юридическай көмөҕө тиийэ араас хабааннаах өйөбүлү оҥорор.

Саргылаана Неустроева, СӨ Аҕа дойдуну көмүскээччилэр дьиэ кэргэттэрин кэмитиэтин салайааччытын солбуйааччы: "Маннык көрсүһүү, түмсүү, хас биирдии киһиэхэ болҕомто ууруу уонна бэйэн кыһалхаҕар соҕотох хаалбакка чугас эргимтэлээх, тирэнэр тирэхтээх буолуу наһаа улахан суолталаах. Нэһилиэк, улуус дьаһалтараны уонна манна баар салалталары, биэдэмистибэлэри кытта ыкса үлэлиибит, ол иһин үлэбит түмүктээх диэххэ наада".  

Маастар-кылааска 5 дьиэ кэргэн кэлбит. Кинилэр бары араас бүлүүдэлэри астыыллар. Күһүҥҥү кэм буолан, оҕуруот аһыттан ордук элбэх. Кабачок алаадьытын 6 оҕолоох дьиэ кэргэн бары көмөлөөн ыһаарылыы оҕустулар. Оттон Амма улууһуттан сылдьар Анна Артемьева оҕуруот аһыттан салаакка кыттыста.

Анна Артемьева, маастар-кылаас кыттыылааҕа: "Бэйэм кыһалҕабынан көмө, өйөбүл көрдүү кэлбитим. Мин икки оҕом иккиэн анал байыаннай дьайыыга сылдьаллар. Онон бэйэм кыһалҕабын, уолаттарым кыһалҕатынан көмө көрдүү диэн кэлбитим. Итиэннэ бүгүн ас астааһыныгар кыттыһа сылдьабын". 

Тэрээһин АГАТУ иһинэн Технология уонна салайыы колледжыгар ыытыллар. Бу үөрэх тэрилтэтэ анал байыаннай дьайыыга тиһигин быспакка көмөлөһөр. Сүрүннээн устудьуоннар ас астаан ыыталлар. Оттон бу сырыыга маастар-кылаас ыыттылар.

Наталия Яковлева, АГАТУ иһинэн технология уонна салайыы колледжын дириэктэрэ: "Өрөспүүбүлүкэттэн кэлбит эти, балыгы, оҕуруот аһын, сир аһын астаан-үөллээн буойуттарга ыытабыт. 3 сыл устата 3 туоннаттан тахса бородууксуйаны оҥорон ыыттыбыт".

Маастар-кылаас кеыттыылаахтара тэрээһин түмүгэр бары бииргэ олорон астаабыт астарын амсайдылар, ирэ-хоро кэпсэттилэр.