Бастакы Агрономическай форум ыытылынна
Тулагы-Киллэм ытык сиригэр Гелена Менякова хаһаайыстыбатыгар өрөспүүбүлүкэ таһымнаах агрофорум үөрүүлээх быһыыга-майгыга арыллар. Ыраахтан-чугастан агроном идэлээх исписэлиистэр биир сиргэ түмүстүлэр. Хаһаайыстыба номнуо сиппит оҕуруот астарынан кэлбит ыалдьыттары күндүлээтэ. Онно төһүү ыһыыны эрдэ саҕалааһын.
Гелена Менякова, хаһаайыстыба салайааччыта: "Оҕурсубун муус устар 21 күнүгэр олордубутум. Ол аата 120 күн буолла үүммүтэ. Биир теплицаҕа 3 тыһыынча ук олорор. Эрдэ ситэрим Стелла суорт, оттон уһуннук ситэрим Зозуля. Быйылгы дьыл тымныы, ону ол диэбэккэ үүнүү ылан олоробун".
Чахчы быйыл агрономнарга "баата суох" сайын да буоллар, сыралаах үлэ түмүгэ бэйэтин биллэрэр. Бу эйгэ исписэлиистэрэ форумҥа анаан-минээн бу хайысхаҕа туох үлэни ыытары, уоҕурдуу чааһын кэпсэттилэр. Гелена Менякова хаһаайыстыбата онно үтүө холобур буолла.
"Тустаах хаһаайыстыба улахан помидор теплицалаах. Манна Черри суорду олордоллор эбит. Көрөргүт курдук номнуо буспуттар. Түгэнинэн туһанан амсайан көрдүбүт, олус минньигэс эбит", - Анастасия Добрянцева, корреспондент.
Салгыы халыҥ хамаанда "Олимп" хаһаайыстыбаҕа ыалдьыттаата. Манна кэлбит ыалдьыттарга хаһаайыстыбатын көрдөрдө. Ымпыктаах үлэ түмүгэ - номнуо эмиэ сиппит перецтар, сүбүөкүлэлэр, кабачоктар, баклажаннар, хаппыысталар, онтон да атын оҕуруот астара дьон дьүүлгэр турбуттар. Манна даҕатан эттэххэ, быйыл ыһыыга хаһааҥҥытааҕар да күүстээх үлэ барда.
Артём Александров, СӨ тыа хаһаайыстыбатын миниистирэ: "Оҕуруот аһын олордуу ортотунан иэнэ 1100 гектар. Өрөспүүбүлүкэҕэ 28 тыһыынчаттан тахса туонна оҕуруот аһын олордоммут туһанабыт. Ол эбэтэр бэйэ хааччыныы 38% буолар. Быйылгы көрдөрүү куһаҕана суох, паардааһын иэнин кытта ааҕан 58 тыһыынча гектарга тахсыахтаахпыт".
Хаһаайыстыбалары сайыннарыыга тустаах министиэристибэ эмиэ болҕомтотун уурар. Быйыл Дьокуускай куорат эргин баар 4 хаһаайыстыбаҕа 5-тии мөллүйүөн солкуобай көмө үп көрүлүннэ. Итиэннэ эдэр исписэлиистэри бу эйгэҕэ тардарга көдьүүстээх үлэ барар диэн тэрээһин сүбэ мунньаҕар эттилэр. Агрономическай форум түмүгүнэн кустарниковай хаһаайыстыбаларга болҕомтону уурар туһунан сорук турда.