Өймөкөөҥҥө халаан айан сырыытын хааччахтыыр
Халаан суолу быспыт сирин олохтоохтор эрэһиинэ тыынан туорууллар. Агайакаан хайа үрэҕэ буолан олус күүстээх сүүрүктээх, онон оҥочону быалаан баран икки өттүттэн тардан, бастаан дьахтар аймаҕы, оҕолору соһоллор. Оттон тимир көлөҕө сырыы олоччу суох. Онон хас да нэһилиэк суола-ииһэ суох ойдон хаалла. Бу суолунан чөлүгэр түһэрии матырыйаала тиһигин быспакка тиэллэ турбута, билигин хаайтаран тураллар. Уһун кэмнээх ардах кэннэ уу таһыма тахса турар, уустук балаһыанньа Өймөкөөн нэһилиэгэр бэлиэтэнэр.
Александр Оконешников, Өймөкөөн улууһун баһылыга: "Өрөспүүбүлүкэ таһымнаах суолбут Акайакаан аттыгар быстан турар. Ол иһин куоракка барыыга суолбут-ииспит суох. Матырыйааллары тиэйэн иһэр массыыналар Агайакааҥҥа хаайтаран тураллар. Бүгүҥҥү күн туругунан, биэс улуустан 35 киһи үлэлии сылдьар. Уопсайа чөлүгэр түһэриигэ 15 улуустан уонна ХИФУ устудьуоннара, “Саханефтегазсбыт” тэрилтэ үлэһиттэрэ уопсайа барыта 160-ча киһи кэлэн үлэлээн бардылар".
Маны тэҥэ Куйдуһун үрэҕэ эмиэ хаатыттан тахсан Сордоҥнооххо барар суол быстан турар. Алдьаныы икки сиргэ иккиэннэригэр 10 тахсалыы миэтэрэ усталаах. Таһым үрдүүр буолан, чөлүгэр түһэрии билиҥҥитэ табыллыбат.
Егор Ефимов, СӨ массыына суолларын салалтатын генеральнай дириэктэрин бастакы солбуйааччы: "Халаан уута билигин да түспэккэ турар. Таһым түстэ эрэ суолу көрөр тэрилтэ бэлэм турар. Миэстэтигэр кылгас кэм иһигэр суолу чөлүгэр түһэриэхтэрэ. Онон уу түһэрин күүтэбит".
Ардах уута "Халыма" федеральнай трассаҕа эмиэ улахан алдьатыыны таһаарда. 1116 килэмиэтиргэ Ньара өрүс таһыма тахсан 200 миэтэрэ усталаах сиргэ трассаны суурайда. Билигин манна икки өттүттэн суол үлэһиттэрэ дьуһуурустубалыыллар. Кыра кыамталаах массыыналарга сырыыны тумнар сир оҥорон сөргүттүлэр.
Евгений Бугуев, : "Уончака тиэхиньикэ үлэлии сылдьар. Ону таһынан чугас баар өрөмүөн эбийиэгиттэн тиэхиньикэлэр көмөҕө бардылар. Итинэн сирэ сымнаҕас, онон бөҕөргөтүү үлэтин ыытыахтаахпыт. ".
Алдьаммыт кэрчик икки өттүгэр улахан кыамталаах көлөлөр хаайтаран тураллар. Дьокуускай өттүттэн 50 тахса, оттон Магадан диэкиттэн 30 тахса массыына субуллан турар.