Ардах халааныттан эмсэҕэлээбит Өймөкөөн улууһугар чөлүгэр түһэрии үлэтэ салҕанар

Айылҕа ааҥнаабыт алдьархайын кэннэ чөлүгэр түһэрии.  Ардах халаанын алдьатыыта олус улахан буолан, сорох дьон балааккаҕа олорон эрэ өрөмүөннэрин үмүрүтэллэр. Өймөкөөн нэһилиэгин олохтооҕо, математика учуутала Ирина Кондакова сиэннэрин кытта бу курдук оҥостон олороллор. Кини дьиэтин кээһэниитэ улахан буолан, хас да биригээдэ аккаастыы сылдьыбыт.   

Ирина Кондакова, Өймөкөөн нэһилиэгин олохтооҕо: "Дьиэҥ туруга олох наһаа ынырык эбит, акылаата буорайбыт диэннэр атын ыалга үлэлии тахсыбыттарыгар санаам наһаа хараастыбыта. Билигин таатталар быһа гыммаккалар үлэлии-хамсыы сылдьаллар".

Билигин Таатта улууһун биригээдэтэ акылааты уларытыыга киирдэ. Кинилэргэ Томпо улууһуттан көмөҕө кэлбиттэр кыттыһан, үлэ тэтимнээхтик барар.

Степан Старостин, Амма улууһун Чычымах нэһилиэгин баһылыга: "Дьиэ-уот, нэһилиэнньэ төһө эмсэҕэлээбитин кэрийэ сылдьан кэлбит күммүтүгэр көрбүппүт. Дьиэлэр акылааттара, тэлгэһэлэр, суол-иис, нэһилиэк бүтүннүүтэ сүрдээҕин халаан уутуттан урусхалламмыт".

Гаврил Петров, Таатта улууһун администрациятын салайааччы: "Эрдэ улуус дьаһалтатын кытта төлөпүөннэһэммит туох үлэ күүтэрин чуолкайдаабыппыт. Уонна улууспутугар акылаат уларытыытынан дьарыгырар киһи үнүстүрүмүөннэрин уларсан кэлбиппит төһүү буолла".

Ый анараа өттүгэр Өймөкөөн нэһилиэктэрэ бу курдук күүскэ халаантан эмсэҕэлээбиттэрэ. Маны барытын чөлүгэр түһэриигэ олохтоохтрго улуустартан кэлэр биригээдэлэр көмө буолаллар.

Владимир Илларионов, Томпо улууһун администрациятын салайааччы: "Томпо оройуонун олохтоохторо хомуйбут гуманитарнай көмөлөрүн, утуйар, таҥнар таҥастары илдьэ кэллибит. Үлэ бу манан тохтуо суоҕа дии саныыбын. Атын да биригээдэлэр хомуллан кэлэ тураллара буолуо, үлэ олох элбэх эбит". 

Эбэ хаатыттан тахсан олорор дьиэлэри, социальнай эбийиэктэри таһынан суолу-ииһи улаханнык суурайбыта, муосталары суулларбыта. Өймөкөөн нэһилиэгэр муостаны чөлүгэр түһэрии барар. Саҥа миэстэҕэ көһөрүөхтэрэ, урукку сирин уу олоччу суурайбыт. Бу нэһилиэк общественнига Тамара Винокурова устуутун көрөбүт.

Маны сэргэ чөлүгэр түһэриллэр кыаҕа суох  дьиэлээхтэргэ, саҥаны тутууга матырыйааллар кэллилэр. Балаҕан ыйын ортотугар диэри бүтэрин туһунан олохтоох салалта иһитиннэрэр. Билигин бары күүс ититии систиэмэтин оҥорууга ууруллар. Оттук сезона бу кэллэ, аны ардах атахтыыр. Ол иһин күн былдьаһыга.    

Александр Оконешников, Өймөкөөн улууһун баһылыга: "Сылааһы биэрэр ситиммитин чөлүгэр түһэрии бара турар. “Теплоэнергосервис” тэрилтэ кэлэн Биэрэк Үрдүгэр үлэлии сылдьаллар. Бу ый 20-22 күннэригэр түмүктүөхтээхтэр".

Өймөкөөн улууһун олохтоохторо кыстык иннинэ дьиэлэрин чөлүгэр түһэриигэ түбүгүрэллэр, ону тэҥэ аны отторо ыгар. Ардахтаах буолан үгүс нэһилиэктэр ходуһаҕа тахса да иликтэр.