Үөрэх тэрилтэлэригэр куттала суох буолууну хааччыйыы

Росгвардия федеральнай сулууспатын Саха сиринээҕи салалтатын биэдимистибэ таһынан харабыллыыр салаатын сүрүннүүр пуоһугар сарсыардаттан иһитиннэриилэр тохтоло суох киирэллэр. Манна  кииннэммит пультовай охранаҕа үөрэх, уһуйаан эбийиэктэрэ кэтэбилгэ тураллар.

Билигин Дьокуускай куорат уокуругар уонна Жатайга бу хайысхаҕа бэрэбиэркэлэр бара тураллар. Сүрүн үлэ - террору утары охсуһууга ууруллар. Эбийиэктэр куттал үөскүүр кэмигэр харыстанар бэлэмнэрин бэрэбиэркэлииллэр. Маныаха үлэһиттэр үөрэх ааһаллар.

Эдуард Миронов, Росгвардия федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын кииннэммит кэтэбилин пуунун дьуһуурунайа: «Күлүгээн киирдэ оскуолаҕа, харабыл кунуопка баттыыр, биһи массыынабыт тута тиийэр. Икки массыына тиийэр, биирэ бүөлүүр, биирэ күлүгээни тутан полицияҕа тириэрдэр».

Саҥа үөрэх дьылыгар эмиэ маннык хабааннаах үлэ барыаҕа. Күн бүгүн тустаах бэдэмистибэ муниципальнай уопсай үөрэхтээһин 63 кыһатын, орто анал үөрэх  40 эбийиэгин, 87 уһуйааны уонна эбии үөрэхтээһин 14 дьиэтин кэтэбилгэ тутар.

Николай Канаев, Росгвардия федеральнай сулууспатын Саха сиринээҕи салаатын биэдэмистибэ таһынан харабыллыыр салалтатын эбийиэктэр кэтэбиллэрин тэрийиитин хааччыйар салаа иниспиэктэрэ: «Массыыналары спутник нөҥүө “Алмаз” навигационнай ситим харыстыыр. Бу ситим массыыналар хамсааһыннарын көрдөрөр. Куттал туһунан биллэрии кэллэҕинэ, тута массыына чопчу турар сирин биллэрэр».

Манна даҕатан эттэххэ, тустаах биэдэмистибэ сыл саҕаланыаҕыттан 4655 суһал иһитиннэриннэн 2168 киһини туппут. Онтон 1300 эппиэтинэскэ тардыллыбыт. 60 буруйу арыйыыга көмөлөспүт. Маныаха билигин салалтаҕа полиция дуоһунаһыгар үлэһиттэргэ наадыйаллар.

Наталья Тырахинова, Росгвардия федеральнай сулууспатын Саха сиринээҕи салалтатын биэдэмистибэ таһынан харабыллыыр салаатын каадырдарынан хааччыйар исписэлииһэ: «Биһиэхэ полицейскай дуоһунаска эр дьон, кыргыттар 18 саастарыттан 50 саастарыгар дылы, армияҕа сулууспалаабыт эр дьон, орто анал үөрэхтээх буолуохтаахтаахтар уонна доруобуйалара ирдэбилгэ эппиэттиир буолухтаах. Уголовнай уонна администартивнай эппиэтинэскэ тардыллыбатах буолуохтаахтар».

Маныха кэлэр нэдиэлэттэн үрдүк үөрэх кыһаларын бэрэбиэркэлиир үлэлэр ыытыллан саҕаланыахтара.