Саха сиригэр үрдүкү уонна орто үөрэх кыһаларыгар босхо үөрэниигэ туттарсыы түмүктэнэр
Үөрэххэ туттарсыы бастакы түһүмэҕин түмүктэрэ биллэн, үөрэххэ киирбит оҕолор үөрэх кыһатын кытта билсэллэр. Чурапчы улууһуттан сылдьар Анастасия Сотникова кыра эрдэҕиттэн психолог идэтин интэриэһиргиир эбит, онон үөрэҕин бүтэрээт докумуоннарын тутатына бу салааҕа ыыппыт.
Анастасия Сотникова, М.К. Аммосов аатынан ХИФУ 1 кууруһун устудьуона: «СПО кэннэ үөрэххэ киирбитим. СПОнан быйыл эрэ үөрэххэ киириэххэ сөп эбит, ол иһин наада дии санаатым. Мин психолог үөрэҕин оскуолаттан быһа сөбүлээн көрөр этим. Экзамен бөҕөтүн туттаран киирэн үөрбүтүм аҕай».
Оттон Хотугулуу-Илиҥҥи федеральнай университекка үөрэххэ туттарсыы салҕанар. Быйыл үөрэх кыһатыгар 4 тыһыынчаттан тахса бүдьүөт миэстэтэ көрүлүннэ. Кэккэ институттарга саҥа идэлэр аһылыннылар, онон быйыл элбэх сайаапка киирдэ диэн тутар хамыыһыйа билиһиннэрэр.
Михаил Сергеев, М.К. Аммосов аатынан ХИФУ тутар киин хамыыһыйатын сүрүн исписэлииһэ: «Бүгүҥҥү күн туругунан ХИФУ 10 тыһ. тахса абитуриент сайабылыанньатын биэрдэ. Уопсайа 6 тыһ. миэстэлээхпит, онтон 3 тыһ. бүдьүөт хайысхаларыгар барар. Быйыл саҥа хайысха кирдэ – тутуу орто үөрэҕэ баар буолла».
Бу сайын устата киин үөрэх куорпуһугар хас биирдии үөрэх салаатыгар анал испэсэлиистэр туттарсааччылары кытта үлэлэстилэр. Үөрэххэ киирбитин туһунан бирикээс тахсыар диэри, хас биирдии абитуриены кытта ыкса сибээһи туталлар. Маны таһынан маҥнайгы кууруска киирбит оҕолорго устудьуон оскуолата диэн бырайыак үлэлиир.
Күннэй Егорова, "Школа первокурсников" бырайыак кураатара: «Сыл аайы саҥа киирээччилэр манна кэлэн устудьуон олоҕун эрдэттэн билэллэр. Билигин бастакы сезон буола сылдьар. Иккис аныгыс нэдиэлэттэн саҕаланыахтаах. Кыттааччылар уопсайга олороллор, араас лекциялар, күрэхтэр буолаллар. Уонна студгородокка адаптацияланаллар».
Сылын аайы Хотугулуу-Илиҥҥи федеральнай университекка үөрэниэн баҕалаахтар элбээн иһэллэр диэн тутар хамыыһыйа иһитиннэрэр. Быйыл абитуриеннар ордук докумуоннарын юрист, быраас, инженер, учуутал идэлэригэр туттарбыттар.