Киин куоракка кыстыкка бэлэмнэнии ортолотто

Эргэ ититии тэрилин саҥа радиатордарга уларытыы. Киин куорат хомунаалынай хаһаайыстыбатын үлэһиттэрэ олорор дьиэлэри кыстыкка бэлэмнииллэр. Билигин бу оннуттан өрөмүөн үлэлэрин чэрчитинэн хас да дьиэҕэ ититии ситимин саҥардаллар. Дьокуускайга уопсайа 19 дьиэҕэ хапытаалынай өрөмүөн үлэтэ ыытыллыахтаах.

Фёдор Лукин, оннуттан өрөмүөн үлэтигэр пуонда сүрүн инженерэ: «Ол 19 дьиэттэн бүгүҥҥү турукка 9 дьиэҕэ күүскэ үлэ бара турар болдьохтон хаалымаары».

Оттон өрөмүөн үлэлэрэ бары дьиэлэргэ оттук кэмэ саҕаланыан иннинэ, ол эбэтэр атырдьах ыйын бүтүүтэ хайаан да түмүктэниэхтээх. Ол курдук, үлэһиттэр сүрүннээн ититии ситимин төрдүттэн уларыталлар, иһин ыраастыыллар.

Владислав Слепцов, Дьокуускай куорат баһылыгын олох-дьаһах коммунальнай хаһаайыстыбаҕа солбуйааччыта: «Элбэх кыбартыыралаах дьиэлэри бэлэмнээһиҥҥэ, ситимин ыраастааһына 76% буолла. Соцэбийиэктэри бэлэмнээһиҥҥэ, ситимин ыраастааһына 84% буолла. Хочуолунайдар өрөмүөннэрэ 63% туолан турар. Быйыл саҥа Минэнерго бирикээһэ киирдэ 22-34 №-дээх. Онон биһи билигин пааспар уонна бэлэмнэнии аактатын ыларга буолунай докумуон толорорбут наада».

Ол курдук быйылгыттан туһанааччылар кыстыкка бэлэм буолуу пааспарын уонна аактаны ыларга хайаан да оценочнай лист диэни толороллор. Маны олорор сирдэринэн туһааннаах уорганнарга тиийэн оҥоттороллор. Сиһилии биир кэлим диспетчерскэй сулууспаҕа эрийэн билсиэххэ сөп.

Оттон киин куораты бүтүннүү сылааһынан хааччыйар баараҕай эбийиэк Дьокуускайдааҕы ТЭЦ итиини биэрэргэ бэлэмнэнэр. Манна хас биирдии кыра тимир чааһыттан олохтоохтор кыстыгы этэҥҥэ туорууллара тутулуктаах. Онон үлэ түүннэри-күнүстэри тохтоло суох ыытыллар. Маныаха туһанааччылар ититии ситимигэр холбоноллоругар кыстыкка бэлэм буолуу пааспардара уонна аакталара баар буолуохтаахтар.

Юрий Нидзельский, Дьокуускайдааҕы ТЭЦ ититии ситимин техническэй инспиэксийэтин сүрүннүүр исписэлииһэ: «До 25 августа должны закончить подготовку и приступить к получению оценочных листов и актов, паспортов готовности».

Дьокуускайга социальнай эбийиэктэргэ сылааһы балаҕан ыйын 1 күнүттэн биэрэн саҕалыахтара, оттон олорор дьиэлэри халлаан туругуттан көрөн быһа холоон балаҕан ыйын 15 күнүттэн ититии ситимигэр холбуохтара. Онуоха диэри бары өрөмүөн, бэлэмнэнии үлэлэрэ түмүктэниэхтээхтэр.