Аҕыйах хонук иһигэр 20 тахса киһи матасыыкыл кыттыылаах суол саахалыгар түбэстэ

4 матасыыкыл көлө ыытааччылара суорума суолланнылар. Бу көстөр каадырдарга өрөспүүбүлүкэни аймаабыт куорат таһынааҕы Хатас сэлиэнньэтигэр тахсыбыт суол саахалын көрөҕүт. Барыллаан силиэстийэ түмүгүнэн “Тойота Аллион” мааркалаах тимир көлө суоппара итирик туруктаах уруулга олорон, суол утары өттугэр тахсан “РегулМото” матасыыкылы кытта харсыспыт.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ инспиэктэр: «Капитоновка диэкиттэн 37 саастаах матасыыкыл суоппара Тулагы диэки айаннаан иһэн суол утары хайысхатыгар тахсан “Ниссан” тимир көлөнү кытары суол саахалын таһаарбыт. Ол түмүгэр бэйэтэ балыыһаҕа суукка иһигэр күн сириттэн туораабыт. Суол саахала тахсыбыт сиригэр күн сириттэн туораабыттара. 15 саастаах матасыыкыл суоппара уонна “Тойота” тимир көлөнү кытары харсыһыы тахсыбыта. Ол түмүгэр 15 саастаах матасыыкыл суоппара уонна 16 саастаах киниэхэ олорсон испит пассажир».

Бу алдьархай быһыыланнар аҕыйах хонук иһигэр таҕыстылар. Куоракка балаһыанньа маннык эбит буоллаҕына, бу эмиэ Үөһээ Бүлүү улууһугар матасыыкыл кыттыылаах суол саахалыгар, хомойуох иһин биир киһи суорума суоланна. 

Ирина Ефремова, СӨ суолга куттал суох буолуутун хааччыйар иниспиэксийэ пропаганда салаатын судаарыстыбаннай иниспиэктэрэ: «Саха сирин үрдүнэн уопсайа 446 суол саахала таҕыста. 45 киһи тыына быһынна, 596 киһи араас эчэйиини ылла. 58 суол саахала мототырааныспары кытта буолла. Манна 10 киһи тыына быһынна, олортон 4 оҕо буолар».

Манна биллибитинэн матасыыкыл кыттыыллаах суол саахалын кыттааччылара ким да төбөнү харыстыыр шлема, бу көрүҥ тырааныспары ытыыга анал категориялара суоҕа биллибит. Маныаха матасыыкыл көлөлөрө учуокка турбатах.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ инспиэктэр: «Матасыыкыл суоппара ыытыан иннинэ автошколаҕа үөрэниэхтээх уонна бэйэтэ сөптөөх категориялардаах буолуохтаах, ол эбэтэр – А, А1 категория. Тимир көлө суоппардарыгар чуолаан этиэхпит этэ – матасыыкыл иһэрин сороҕор киһи өйдөөн көрбөт даҕаны, ол иһин хайаан даҕаны кэнники сиэркиэлэҕитин уонна онтон маневр оҥоруоххутун иннинэ поворотниккытын холбуургутун умнуман».

Билигин бу быһыылааннарынан бэрэбиэркэлиир, силиэстийэлиир үлэлэр бараллар. Оттон суолга сэрэхтэээх буолуу инспиэксийэтэ төрөппүттэргэ чуолаан сэрэтэр: матасыыкыл, питбайк, электросамокат көлөлөрү оҕолорго атыылаһары толкуйдаан баран ыларга ыҥыраллар. Бу хайысхаҕа үлэ барар.