Дьокуускайга илии-атах протеһын оҥорор киин үлэлиир.

15 сылын техник-протезиһынан үлэлиир Сергей Николаев пациентан слепок ылар. Протез хас биирдии киһиэхэ тус кээмэйинэн чопчу оҥоһуллар. Маныаха киһи илиитин-атаҕын чааһын протеһын бэлэмнэнэр болдьоҕо кээмэйиттэн, көрүҥүттэн, уустугуттан тутулуктаах.

Сергей Николаев, техник-протезист: «Манна прототип оҥоробун, манна гиипсэ кутабын уонна кээмэйинэн аалабын».

Бастаан боруоба гильзаны таҥаллар, бары чааһын хомуйаллар уонна ыарыһахха биэрэн нэдиэлэ кэриҥэ кэтэрдэн кэтииллэр. Салгыы итэҕэстээх, мэһэйдиир игин буоллаҕына барытын көннөрөн-чочуйан биэрэллэр. Ол эрэ кэннэ постояннай протез оҥоһуллан, кэтэргэ бэлэм буолар. 

Арина Винокурова, инженер-протезист: «Протезтар араастаах буолаллар. Модульнай, микропроцессорнай диэннэр. Ким хайдах кыанарыттан, ыйааһыныттан, сааһыттан көрөммүн оҥоробут».

Дьокуускайга 2020 сыллаахтан протезирование Киинэ аһыллан үлэлиир. Манна араас төрүөтүнэн илиитэ-атаҕа суох хаалбыт дьоҥҥо, сүрүннээн производственнай травма, оһол, ыарыы кэннэ инбэлиит буолбуттарга көмөлөһөллөр. Бу кэнники сылларга анал байыаннай дьайыы кытыылаахтарын кытта ыкса үлэлииллэр. Үөһээ Бүлүү улууһуттан сылдьар Владислав Кардашевскай мобилизацияҕа түбэһэн анал байыанай дьайыыга барбыта. Былырыын бааһырыы кэннэ атаҕын аҥара суох хаалан төннөн кэлбитэ, Саҥа Дьыл кэннэ манна  кэлэн бастакы протеһын оҥотторбута. 

Владислав Кардашевский, анал байыаннай дьайыы кыттыылааҕа: «Бастаан боростуой протез этэ. Бу саҥа модульнайы кэттим. Үчүгэй, торуоската суох хаамабын».

Кииҥҥэ ортотунан сылга 500-кэ араас протеһы бэлэмнииллэр. Протез матырыйааллара, сапчаастара Арассыыйа эрэ буолбакка, тас дойдулар фирмаларын кытта үлэлэһэллэр. Бастаан кэлбиттэр консультация ааһаллар. Салгыы сөп түбэһэр протеһын бэлэмнээн, медико-техническэй акт оҥороллор. Онтон протезтааһыҥҥа бэлэмнэнии түһүмэҕэ элбэх бириэмэни эрэйэр. Эппэрээссийэ кэннэ баас толору оһон культя, ол эбэтэр быһыллыбыт ордук, протезка бэлэм буолара ирдэнэр.

Людмила Спиридонова, эмтиир физкультура инструктора: «Культя бэлэмиттэн бу киһи протеһын хайдах туттара улахан суолталаах. Ол иһин оннук дьарыкпыт хас эмэ ыйынан буолар».

Кииҥҥэ кэлбиттэр манна сытан эрэн протез кэтэргэ үөрэнэллэр. Ол курдук Кииҥҥэ 11 куойкалаах стационар баар. Маннык эмтиир фзкультуранан дьарыктанан, эттэрин-сиинэрин эрчийэллэр, протеһынан сөпкө туттарга, хаамарга үөрэнэллэр.

Антон Гоголев, анал байыаннай дьайыы кыттыылааҕа: «Түргэн, бастакы күммэр слепок оҥорбуттара уонна бу сарсыныгар кэлэн хаама сылдьабын».

Протезирование Киинэ салгыы кэҥээн оҥорон таһаарар кыаҕын улаатыннарар былааннаах.