Монголия сиригэр мас рестлинг көрүҥэр 7-с аан дойдутааҕы чемпионат түмүктэннэ

Саха сирин биир бастыҥ мадьыныта Дмитрий Попов аан дойду аренатын муҥутуур чыпчаалыгар 5-с төгүлүн тахсан тэҥнээҕин булбата. Уонна 105 киилэ ыйааһыҥҥа бу да сырыыга кыайыы амтанын биллэ. Маны тэҥэ 75 киилэҕэ Василий Захаров ааспыт сыллааҕы көрдөрүүтүн ыһыктыбакка, аан дойду 2 төгүллээх чемпиона буолла. Оттон дьахталларга Татьяна Баишева 3 төгүллээх кыайыылаах аатын сүктэ уонна бу күрэхтэһиинэн улахан спортан барарын туһунан биллэрдэ.

Монголия дойдутугар Архангай-аймак туонатыгар мас тардыһыыга 7-с аан дойдутааҕы чемпионат үрдүк таһымҥа ыытылынна. Саха сирин мадьынылара бу да сырыыга бастыҥ буолалларын дакаастаатылар. Ол курдук, 8 кыһыл көмүс, 3 үрүҥ уонна 1 боруонса мэтээли ылары стистилэр.

90 киилэҕэ диэри ыйааһыҥҥа Семен Борисов аан бастакытын улахан аренаҕа кыайыылаах аатын сүктэ. Кини 8 сыллаах тохтобул кэннэ улахан спортка төнүннэ уонна тутатына аан дойду чөмпүйүөнэ буолла. Ол эрэн, кыайыы чэпчэкитик кэлбэтэ диэн этэр.

Семён Борисов, мас тардыһыытыгар 7-с аан дойдутааҕы чемпионат 90 киилэ ыйааһыҥҥа кыайыылааҕа: «Ынырык бэлэмнэмиттэр, ыарахан киирсии буолла. Саамай ыараханнык кэлбит кыайыы. Бастакыбын Чемпионат мира кыттабын».

Кырдьык да кэнники сылларга атын омуктар тиэхиникэни баһылаан, күүскэ дьарыктанан үрдүк таһымы көрдөрөр буоллулар. Оттон бу саха төрүт көрүҥэ аан дойдуга сайдыбытын туоһута буолар. Быйылгы күрэхтэһиигэ 33 дойдуттан кыттааччылар муһуннулар.

Иван Готовцев, Россия сүүмэрдэммит хамаандатын сүрүн тренерын эбээһинэһин толорооччу: «Сүрдээҕин күүһүрэн иһэллэр. Кыргызстан ордук күүстээх. Ону таһынан Монголия олох күүскэ ылсан Саха сиригэр иккитэ сборданан, сайын саҕаланыыта Аммаҕа сбордаммыттара, уопут ылаллар, тиэхиникэ өттүгэр олох сүрдээҕин эппиттэр».

3 күн устата Монголия сиригэр улахан спорт бырааһынньыга ыытылынна. Истиэп дойдута күрэхтэһиини тэрээһиннээхтик уонна үрдүк таһымҥа ыытта. Маныаха спортсменнар олорор сирдэриттэн саҕалаан чемпионат ыытыллыбыт арената кытта ураты тыыннаах буолла.

Онон мадьыныларга өссө биир кыайыы үктэллээх, үгүс ситиһиилээх спорт кэмэ түмүктэннэ. Билигин спортсменнар сынньанан, саҥа тыын ылан кэлэр күрэхтэһиилэргэ бэлэмнэниэхтэрэ.