Бүгүн бастакы Президеммыт Михаил Ефимович Николаев олохтон барбыта 2 сыла

Өктөм нэһилиэгин Чапаев сирэ. Свято-Троицкай Таҥара Дьиэтин территориятыгар бастакы Президеммыт Михаил Ефимович Николаев көмүс уҥуоҕа хараллан сытар. Манна аттыгар кини үөрэммит оскуолата билигин нэһилиэк үөрэҕириитин музейа буолан турар. Сотору кэминэн бу сиргэ саха норуотун улуу киһитигэр анаммыт баараҕай өйдөбүнньүк комплекс дьэндэйиэҕэ.

Михаил Керемясов, СӨ инники көлүөнэ фондун генеральнай дириэктэрин солбуйааччы: «Михаил Ефимович сытар сирэ мемориал ортото буолар. Икки стела аан курдук буолар».

Мемориальнай комплекс бу эргин сири бүтүүннүү хабыаҕа. Урукку оскуола-музей, Таҥара Дьиэтэ оннунан хаалыахтара. Арай Таҥара дьиэтин тас тимир профиль хаҕын устан, урукку мас көстүүтүн сөргүтүөхтэрэ. Комплекс бырайыагын күрэҕэр "Градо" диэн эдэр архитектордар түмсүүлэрэ кыайыылаах тахсыбыта. Граниттан таҥыллыбыт улахан стеллалаах тутуу сыаната барылаан ааҕыынан 160-тан тахса мөлүйүөҥҥэ тэҥ. 

Айсен Николаев, СӨ Ил Дархана: «Строительство мемориального комплекса будет вестись за счет средств фонда «Будущих поколений». Я думаю, это справедливо, потому что Михаил Ефимович его создал, ресурсы на это у нас есть».

Михаил Николаев уларыта тутуу дьалхааннаах кэмигэр саха норуотун дьылҕатын бэйэтин тус эппиэтинэһигэр ылбыт, муударай, инникини өтө көрөр дириҥ быһаарыылары, саҕалааһыннары олоххо киллэрбит, олохпут-дьаһахпыт бары араҥатыгар сайдыы акылаатын уурбут, киэҥ аартыгар туруорбут киһинэн буолар.

Афанасий Ноев, СӨ култуура уонна духуобунай сайдыы миниистирэ: «Саха сирэ өрөспүүбүлүкэ быһыытынан сайдарыгар олоҕун анаабыт бастакы Президеммыт үлэтэ-хамнаһа көстөр. Кини оҥорбут үлэтин-хамнаһын норуотун кытта арйыбыт саҥа саҕахтарын көрүөхтэрэ-иситиэхтэрэ».

Улуу киһибит олох-дьаһах ханнык баҕар араҥатыгар ис сүрэҕинэн ыалдьара, кини аан дойду үрдүнэн бэйэбит сайдар суоллаах-иистээх норуоппут диэн өйү-санааны иҥэрбитэ.

Татьяна Николаева: «Дьокуускайга Михаил Ефимовичка анаммыт пааматынньык туруоҕа. Ыам ыйыттан бөдөҥ архитектрунай куонкурус биллэриллэн болдьоҕо балаҕан ыйыгар диэри уһатыллыбыта. Салгыы дьүүллүүр хамыыһыйа бастыҥ бырайыагы талан, концепцията оҥоһуллан, турар сиргэ бигэргэтиллэн, кэлэр сылга бырайыак олоххо киирэрэ былааннанар».

Бар дьон, саха норуотун бүттүүнүн дириҥ ытыктабылын, тапталын, сүгүрүйүүтүн ылбыт бастакы Президеммит Михаил Ефимович Николаев баара буоллар 88 сааһыгар сылдьыах этэ. Кини сырдык аата үйэлэр тухары умнуллуо суоҕа, оттон кини саха норуотун сайдыытыгар оҥорбут үтүө, дьоһун кылаата өссө дириҥээн иһиэҕэ.