Саха сиригэр үүтү туттарыы үгэнэ

Хамаанда бэриллэн, хороҕор муостаахтар үөрүйэхтии ыанар сирдэригэр киирэллэр. Сарсыарда 6 чаас оттон Туймаада экофермаҕа номнуо үлэ күөстүү оргуйар. Уҥа, хаҥас салааларга 8 ынах киирэн, 16 хороҕор муостаах биирдэ ыаналлар.

Билигин Туймаада хаһаайыстыбаҕа уопсайа 200-н тахса ынах ыана турар. Аныгы үйэ сиэринэн манна барыта автоматизированнай ыам. Икки ыанньыксыт түргэнник-тарҕаннык туттан-хаптан күҥҥэ хас да  туонна  үрүҥ илгэни үрүйэлии ылаллар.

Татьяна Иванова, хаһаайыстыба биригэдьиирэ: «Сарсыардааҥҥы ыам саҕаланна. 241 ынаҕы ыыбыт. Күҥҥэ 3,7 туонна үүтү ыыбыт уонна Гормолзаводка туттарабыт. 110 туонна ыйдааҕыбыт, былааммытын толорон иһэбит».

Туймаадалар хара бараан, ол эбэтэр черно-пестрай боруода сүөһүнү туталлар. Бу улахан ыамы биэрэр боруода буолар. Үүтүн сыата 3,7-3,8% тииийэр.

Быйыл тустаах хаһаайыстыбаҕа 183 ньирэй күн сирин көрбүтэ. Билигин кинилэр хотон таһыгар күөх чээлэйгэ, мэччирэҥ сиргэ аһыы-сии сылдьаллар. Ыамы кытары тэҥинэн от үлэтэ бара турар. Кыстыгы этэҥҥэ туоруурга үлэ күргүөмнээҕэ барар.

Татьяна Иванова, хаһаайыстыба биригэдьиирэ: «Бүгүҥҥү туругунан 250 туонна от оттонно, 2 звено тахсан үлэлии сылдьар Харыйалаах диэн арыыга уонна Хатыстыыр диэн сиргэ. Сыллааҕы оппут былаана 1100 туонна, 504 га ыһыылаахпыт, 1400 туонна сиилэс, 400 туонна сенаж бэлэмниэхтээхпит. Быйыл ардахтаах буолан үүнүүбүт үчүгэй, кыстыкка киирэргэ бэлэммит».

Ил Дархан уурааҕынан үүтү со5отуопкалааһыҥҥа күүстээх үлэ барар. Бу дьаһал ылылыаҕыттан бу эйгэҕэ чахчы хамсааһын таҕыста. Быйыл номнуо былааны куоһарыы баарын тыа хаһаайыстыбатын министиэристибэтэ иһитиннэрэр.

Егор Чичигинаров, СӨ ТХМ астыыр-таҥастыыр бырамыысаланнас салаатын салайааччыта: «Бүгүҥҥү күҥҥэ сыллааҕы былаантан 56% туоллубут. 35 тыһ. туоннаттан таһаардыбыт. Быйылгы былааммыт 62777 туонна».

Билигин өрөспүүбүлүкэ үрдүнэн үүт туттарааһыныгар үчүгэй көрдөрүүлээх улуустарынан Мэҥэ-Хаҥалас, Чурапчы, Кэбээйи, Сунтаар инникки күөҥҥэ иһэллэр. Быйылгы былаан туолар соруктаах.