Өрөспүүбүлүкэ үрдүнэн быар ыарыыларын сэрэтии нэдиэлэтэ ыытыллар

Аан дойду үрдүнэн вируснай гепатит биир саамай тэнийбит уонна кутталлаах инфекционнай ыарыынан биллэр. Гепатит биэс сүрүн көрүҥэ баар. Олортон В уонна С гепатит хроническай ыарыы быһыытынан сайдаллар уонна быар рагын, цирроһун сүрүн төрүөтүнэн буолаллар

Дьокуускайга клиническай балыыһаҕа бу салаа 1989 сыллаахха Саха сиригэр вируснай гепатит саамай тэнийэ сылдьыбыт кэмнэригэр аһыллыбыта. Салаа уопсайа 50 куойка-миэстэлээх. Манна бигэргэммит быар ыарыһахтар киирэн эмтэниини ааһаллар.

Эмтэнээччи: «Анаалыс бөҕөтүн бардым. Сарсын МРТга барыахтаахпын диагноспын туочунайдатаары».

Бэлиэтээн эттэххэ, бу ыарыы сүрүннээн хаан нөҥүө бэриллэр. Сыллата салааҕа 600-700-чэкэ киһи олохсуйбут гепатиттаах киһи эмтэнэр. Гепатит диэн араас төрүөтүнэн быар сүһүрэр ыарыыта. Билигин С гепатиты атын содулга тиэрдибэккэ эрэ үтүөрдэр уонна вируһу утары охсуһар саҥа туһалаах препараттар баар буоллулар. 

Надежда Тихонова, СӨ клиническэй балыыһатын вируснай гепатит ыарыыларын эмтиир инфекционнай салаа сэбиэдиссэйэ: «Кэлин сылларга элбэхтик онно үлэлиибит. Оройуоннар поликлиникалара ыытаннар биһи ылан эмтиибит. Үлэбит түмүгэ үчүгэй, 98% киһи үтүөрэр».

Ол эрээри быар биллэрбэккэ ыалдьар буолан, дьон үксэ кэмигэр көрдөрбөккө уустугурдан, ыарахан стадияҕа циррозка, биитэр ракка тиийбитин кэннэ биирдэ билэр. Ол иһин хас биирдии доруобай да киһи сылга биирдэ гепатит ыарыыларыгар анаалыс туттаран статуһун билэрэ наада.

Эмтэнээччи: «Анаалыс туттарбытым, поликлиникаттан манна ыыппыттара».

Дьокуускайдааҕы клиническэй балыыһа телеграмҥа Стоп-Гепатит диэн чат бот ханаалын арыйда. Манна киирэн гепатит туһунан толору информацияны барытын билиэххэ сөп. Ону тэҥэ бу күннэргэ гепатитка уонна да атын анаалыстары куорат общественнай сирдэригэр босхо туттарар кыах баар, пааркаҕа уонна кэккэ болуоссакка доруобуйа дьаарбаҥалара ыытыла тураллар.