Кылгас Саха сирин сайыныгар билигин саамай туристическэй кэм оройо

Бүлүүттэн анаан-минээн Булуус ирбэт тоҥун илэ хараҕынан дьиэ кэргэнин кытары көрө Нарыйа Степанова кэлбит. Сайыҥҥы сыралҕан куйааска хаары, мууһу илиинэн тутары,  хайдахтаах курдук дьиктитин кинилэр аан бастакыларын көрдүлэр. 

Нарыйа Степанова, турист: «Сайыннары маннык муус сытара дьикти көстүү. Манна кэлиэхпин баҕарбытым ыраатта».

Кини этиитин кытары, Саха сиригэр биирдэ эмэ охсуллан ааһар Валерия Пермякова сөпсөһөр. Төрөөбүт дойдутугар көтөн кэлээт, кини ураты сирдэринэн хайаан да сылдьабын диэн санаатын үллэстэр. Аан бастакынан кини чугас дьонун кытары Булууска кэлбит.

Валерия Пермякова, турист: «Мин санаабар Булуус Саха сирин биир саамай киһини сөхтөрөр сирэ дии саныыбын. Ол иһин кыах баар буоллаҕына кэлэ сатаан».

Булуус туристиеческэй киинэ 1000 гектар иэннээх сиргэ тайаан сытар. Манна дьон айылҕалыын алтыһан, дууһалыын сынньанан барарыгар усулуобуйа барыта тэриллибит.

Таһырдьа 28 кыраадыс итии, оттон ирбэт тоҥ түмэлигэр оҕолор мууска сырылыы сылдьаллар. Саха сирин эмиэ биир ураты туристары угуйар сиригэр дьон толору. 250 миэтирэ уһуннаах штольняҕа уопсайа 22 экспозиция үлэлиир. Быйыл өссө биир хос саҥалыы тыыннанна.

Номнуо түмэлгэ 14000 тахса турист ыалдьыттаан барда диэн тэрилтэ салайааччыта Айталина Трофимова кэпсиир. Былырыын Азия оҕолоро оонньуу буолан, үгүс элбэх ыалдьыт эбит буоллаҕына быйыл да көрдөрүү хаалсыбат диэн салайааччы санаатын үллэстэр.

Айталина Трофимова, тэрилтэ салайааччыта: «От ыйын ылбакка 14 тыһ. Сүрүнүн Арассыыйаттан кэлэллэр, омук сирдэриттэн Кытайтан кэлэллэр».

Саха сирин өҥүрүк куйааһыттан эмискэ тымныыга киирэр, кэлбит ыалдьыттары олус сөхтөрөр. Өйдөрүгэр хатыламмат түгэни бэлэхтиир.

Саха сиригэр туристическэй кэм билигин саамай үгэннээн турар кэмэ. Тустаах министэрситибэ иһитиннэрэринэн дьон сөбүлээн сирдэрэ Өлүөнэ, Сиинэ очуостара, Тукулааннар, кыыс Амма, Буотама. Маныаха саҥа маршруттар арылла тураллар.