Саха сирин үрдүнэн уопсайа 33 тыьыынча 600-тэн тахса туонна от оттонно
Бөлөрүүс доҕор тыраахтар собуоттанан ходуһаҕа үлэ саҕаланар. Нам улууһун Бөтүҥ нэһилиэгин төрүт олохтооҕо Алексей Марков бу күннэртэн отун үлэтин саҕалаата. Сыллата кини убайын кытары кыттыгас оттууллар. Билигин кинилэр бастакы сирдэригэр оҕустаран, номнуо мунньан, урулуоннаан эрэллэр.
Алексей Марков, Бөтүҥ нэһилиэгин олохтооҕо: «Икки тыраахтарынан сылдьан оттоон сүөһүбүтүгэр кыстыыр оппутун булабыт. Быйыл от үүнүүтэ син аҕай. Сорох үрдүк сирдэргэ мөлтөх».
Чахчы, быйыл сайыммыт сөрүүнүнэн илгийэн, күн -дьыл туран биэрбэккэ, от соччо үүммэтэх диэн отчуттар бэлиэтииллэр. Ол да буоллар санаалара бөҕөх, былааны толорор соруктаахтар.
Былааны толорор соругунан арыыга көһүү Бөтүҥҥэ ыытыллынна. Бу күн нэһилиэк кэтэх да хаһаайыстыбалаахтара, бааһынайдара да эбэни туораан аннараа кытылы буллуллар. Быйыл уу түспэккэ, паромунан туоруурга күһэллэллэр. Онно төһүү олохтоох дьаһалта көмөтө.
Константин Попов, Бөтүҥнээҕи "Сир сайдыытын агентствотын" салайааччыта: «Биһи администрация бэйбит көмө оҥоробут. Былырыын үчүгэй этэ. Быйыл уубут түһэн биэрбэтэ. Билигин биир рейс барда – үс тыраахтар, өссө үс барыа ол кэннэ өссө икки».
Бу курдук биир күргүөмүнэн оччуттары аннараа кытылыга тиксэрэллэр. Холобура, биир барыыга маннна улахан кыамталаах тыраахтар уонна мунньар, рулуоннуур тэриллэр батан бараллар. Бөтүҥнэр онон арыыга отторо бу кэмтэн саҕаланна.
Айаал Местников, "Бөтүҥ нэһилиэгэ" МТ тыа хаһаайыстыбатын исписэлииһэ: «Уопсайа 16 тыраахтар туораата. Оппут былаана 2 тыһ. туонна. Сүөһүбүт 753 төбө, сылгыбыт 567. Быйыл от үүнүүтэ улуус үрдүнэн мөлтөх, былааммытыгар тириэрдэр ини».
Улуустарынан от хаамыытын тустаах министиэристибэ күннэтэ хонтуруолга тутар. Саха сирин үрдүнэн бүгүҥҥү күҥҥэ уопсайа 33,5 тыһынчаттан тахса туонна от оттонно, 58 тыһыынча га сир охсуллан турар. Ааспыт сыл баччаларын кытта тэҥнээтэххэ, хаалыы баар, ол курдук кэккэ улуустарга ардах, айылҕа содула мэһэйдээтэ. Быйыл от үүнээһинэ орто, онтон бу күннэртэн күн-дьыл турдаҕына, былаан син туолар соруктаах.