Бастакы Президеммыт Михаил Николаев дойдутугар аатын үйэтитэр өйдөбүнньүк тутуллуоҕа

Өктөм нэһилиэгин Чапаев сирэ. Свято-Троицкай Таҥара Дьиэтин территориятыгар бастакы Президеммыт Михаил Ефимович Николаев көмүс уҥуоҕа хараллан сытар. Манна аттыгар кини үөрэммит оскуолата билигин нэһилиэк үөрэҕириитин музейа буолан турар. Сотору кэминэн бу сиргэ саха норуотун улуу киһитигэр анаммыт баараҕай өйдөбүнньүк комплекс дьэндэйиэҕэ.

Михаил Керемясов, СӨ инники көлүөнэ фондун генеральнай дириэктэрин солбуйааччы: «Михаил Ефимович сытар сирэ мемориал ортото буолар. Икки стела аан курдук буолар».

Мемориальнай комплекс бу эргин сири бүтүүннүү хабыаҕа. Урукку оскуола-музей, Таҥара Дьиэтэ оннунан хаалыахтара. Арай Таҥара дьиэтин тас тимир профиль хаҕын устан, урукку мас көстүүтүн сөргүтүөхтэрэ. Комплекс бырайыагын күрэҕэр "Градо" диэн эдэр архитектордар түмсүүлэрэ кыайыылаах тахсыбыта. Граниттан таҥыллыбыт улахан стеллалаах тутуу сыаната барылаан ааҕыынан 160-тан тахса мөлүйүөҥҥэ тэҥ. 

Айсен Николаев, СӨ Ил Дархана: «Строительство мемориального комплекса будет вестись за счет средств фонда «Будущих поколений». Я думаю, это справедливо, потому что Михаил Ефимович его создал, ресурсы на это у нас есть. Работы начнутся в этом году, и поставлена задача к 2026 году его закончить».

Ил Дархан Михаил Ефимович көмүллэ сытар сиригэр сибэкки дьөрбөтүн ууран кини сырдык мөссүөнүгэр сүгүрүйдэ. Салгыы көрсүһүү кыттыылаахтара комплекс тутуутун тула мунньахтаатылар. Мунньах бастакы президеммыт аатын сүгэр Николаев Кииҥҥэ буолла. Киин өрөспүүбүлүкэ национальнай библиотекатын филиалын быһыытынан үлэлиир.

Анна Захарова, "Николаев-киин" М.Е.Николаев аатын сүгэр архив-библиотека салайааччытын солбуйааччы: «Биһиги библиотека-архыып курдук үлэлиибит. Манна биһи бастакы Президеммыт Михаил Ефимович Николаев үлэтэ-хамнаһа, олоҕун-дьаһаҕа, биографията, судаарыстыбыннай-политическэй дьайыытын толору биһиги экспозициялаан көрдөрөн туруорабыт».

Саҥа комплекс нэһилиэккэ баар Николаев Киинин, дьоҕус наукалар академиятын түмүөҕэ. Манна кэлэн бар дьон кини төрөөбүт Сахатын сирин сайдыытыгар сүҥкэн кылаатын иһин сүргүрүйэн, убаастабылын биллэрэр, итиэннэ историяны ситимниир общественнай бэлиэ сиринэн буолара күүтүллэр.

Афанасий Ноев, СӨ култуура уонна духуобунай сайдыы миниистирэ: «Саха сирэ өрөспүүбүлүкэ быһыытынан сайдарыгар олоҕун анаабыт бастакы Президеммыт үлэтэ-хамнаһа көстөр».

Маны тэҥэ бу комплексы тэҥэ Дьокуускайга Михаил Ефимовичка анаммыт пааматынньык туруоҕа. Быйыл концепцията быһаарыллан, кэлэр сылга бырайыак олоххо киирэрэ былааннанар.