Саха сиригэр ойуур баһаардарын умулларыы салҕанар

Суукка иһигэр Саха сиригэр 3 ойуур баһаарын умуллардылар. Бу Мииринэй, Өлүөхүмэ уонна Үөһээ Бүлүү улуустарыгар. Үөһээ Бүлүү улууһугар баһаартан ордук кутталлаах кэм саҕаланыаҕыттан  5 га иэннээх сиргэ уопсайа 2 уот тура сырытта. Онтон бүтэһигин бу ааспыт сууккаҕа умуллардылар.

Еремей Алексеев, Үөһээ Бүлүүтээҕи биир кэлим диспетчерскэй сулууспа салайааччыта: «Ойуур баһаардарын Үөһээ Бүлүү авиаотделениятын күүстэринэн 24 десантнай-баһаарынай уонна 12 парашютист-баһаарынай күүстэринэн умуллардылар. 2025 сыл пожароопаснай сезоҥҥа 2 ойуур баһаарын төрүөтэ этиҥтэн таҕыста».

Манна даҕатан эттэххэ, ааспыт сыл бу кэрчик кэмин кытта тэҥнээтэххэ быйыл тустаах улууска ойуур баһаара 20-чэ төгүл аҕыйаата. Ол курдук, былырыын баччаларга Үөһээ Бүлүүгэ баһаартан сэрэхтээх буолуу кэмэ саҕаланыаҕыттан уопсайа 25 уот тура сылдьыбыта. Оттон билигин үгүс баһаар Сунтаар, Дьааҥы уонна Ленскэй оройуоннарыгар бэлиэтэнэр.

Николай Никитин, СӨ экология, айылҕаны туһаныы уонна ойуур хаһаайыстыбатын министиэристибэтин ойуур харыстабылын уонна чөлүгэр түһэрии департаменын салайааччыта: «Үгүс төрүөтэ кураанах этиҥнэр буолаллар. Былырыын баччаларга биһиэхэ 745 баһаардаах этибит, 2126000 га кэриҥэ иэннээх этэ. Онно холоотоххо быйыл халлааммыт туран биэрэн уонна үбүлээһинэ күүстээх буолан баһаардары кыра эрдэхтэриттэн умулларан улаатыннарбатыбыт уонна мониторинг күүскэ барар».

Онон ааспыт сылы кытта тэҥнээтэххэ быйыл салгынынан уонна сиринэн күүстээх кэтээн көрүү үлэтэ баран ойуур баһаарын ахсаана лаппа аччаан турар. Ол эрэн, күн-дьыл туруга син биир бэйэ уларытыыларын киллэрэр. Кураанах этиҥнээх күннэр туран уот тахсар эмиэ биир сүрүн биричиинэтинэн буоллулар. Маны тэҥэ дьон дьалаҕай сыһыаныттан эмиэ баһаар таҕыста.

Андрей Коноплёв, СӨ экология, айылҕаны туһаныы уонна ойуур хаһаайыстыбатын миниистирин солбуйааччы: «Всего с начала пожароопасного сезона уже установлено 65 виновников природных пожаров и составлено 143 протокола за нарушение правил пожарной безопасности. Уважаемые граждане, не становитесь причиной лесных и природных пожаров, будьте осторожны с огнем в лесу. В случае обнаружения лесных пожаров либо возгораний незамедлительно сообщите в региональную диспетчерскую службу по телефону 44-74-76».

Санатан эттэххэ, өрөспүүбүлүкэҕэ бэс ыйын 5 күнүттэн ойуур баһаара тахсар ураты кутталлаах кэмэ биллэриллэн турар. Бу кэм саҕаланыаҕыттан Саха сиригэр уопсайа 56 тыһ тахса га иэннээх сиргэ барыта 182 ойуур баһаара умуруорулунна.