Саха сиригэр тыатааҕы ахсаана элбиир

Киин куорат таһыгар, чугас улуустарга тыатааҕы нэһилиэнньэлээх пууннарга элбээбитин туһунан тэттик видеолар социальнай ситимнэри аймыыллар. Төһө да билигин хара тыа хаһаайыыныгар саамай астаах, өлгөм кэм эбит буоллаҕына тыатааҕылар нэһилиэк диэки тахса турар түгэннэрэ баар буолла.

Саха өрөспүүбүлүкэтин экологияҕа министиэристибэтэ  бу киирэ турар үгүс элбэх иһитиннэриилэринэн үлэлиир. Тыатааҕы мэнээктээбит улууһун булт инспиэктэрдэрин кытары сибээстэһэ олороллор. Тутатына адьырҕа кыылы бултуурга көҥүл биэрэргэ үлэ барар.

Семён Павлов, булт департаменын сүрүннүүр исписэлииһэ: «Оройуоннар инспекцияларыгар ыытабыт, онно булчукка лицензия биэрэллэр. Онно кинилэр 30 күн иһигэр бултуохтаахтар. Элбэх сайаапка Нүөрүнгүрү, Мииринэй, Бүлүү улуустарыттан киирэр».

Бу эйгэ исписэлиистэрэ иһитиннэрэллэринэн кэлиҥҥи кэмҥэ Саха сиригэр тыатааҕы ахсаана элбиир. Үксүн көрдөрүү үрдээһинэ Хотугулуу- Илин, Бүлүү бөлөх уонна Алдан эҥэр улуустарга  бэлиэтэнэр. Эһэ элбиирин төрүөтэ ойуур баһаардара, дьон дьалаҕай сыһыана уонна  промышленность сайдыыта буолар.

Иннокентий Семёнов СӨ Биологическай ресурсаларын, айылҕа ураты харыстанар сирдэрин уонна айылҕа пааркаларын дириэксийэтин дириэксийэтин диэриэктэри солбуйааччы: «Элбэх сир баайын хостооччулар үлэлии сылдьаллар, ол иһин кырдьаҕас бэйэтин сириттэн кыйданар. Ол иһин бэйэтигэр сөп түбэһэр сири көрдөнө сылдьар».

Билиҥҥи кэм туругунан 452 тыатааҕыны бултаһарга көҥүл бэриллэн турар диэн тустаах биэдэмистибэ иһитиннэрэр. Онтон хара тыаҕа адьырҕаны кытары көрсүбүт тугэҥҥитигэр олох уолуйумуохха диэн исписэлиистэр тоһоҕолоон этэллэр.

Семён Павлов, булт департаменын сүрүннүүр исписэлииһэ: «Утары эмискэ көрсө түстэххитинэ, төһө да куттаммыккытын иһин биир сиргэ туруоххутун наада. Кыратык саҥаран, кыра-кыралаан кэннигитин диэки барыаххытын сөп эбэтэр биир сиргэ туран эрэ туох эмит малгытынан улахан соҕустук тыаһатыаххытын наада».

Сыллата эһэ ахсаана элбиир. Маныаха чугастааҕы, ыаллыы регионнартан киирии адьырҕа кыыллар ахсааны үксэтэллэр.