Өймөкөөн улууһугар тахсыбыт хорумньуну ааҕыы, чөлүгэр түһэрии үлэлэрэ салҕаналлар

Бестужев-Марлинскай аатынан уулусса 5-гэр халааҥҥа эмсэҕэлээбит Өймөкөөннөргө гуманитарнай көмөнү хомуйар ыстаапка дьон сыбыытаан олорор. Саха сирин улуустарын түмсүүлэрэ күннэтэ дьуһуурустубаҕа тахсаллар. Бүгүн Өлүөхүмэ улууһун үтүө көмөһүттэрэ суһал көмөну тута олороллор.

Евгения Максимова, үтүө көмөһүт: «Үлэбит диэн хоруопкалары дьаарыстаатыбыт, таҥас бөҕө кэлэн турар. Бүгүн ас бөҕөтүн аҕаллылар».

Доҕордуу Кыргыыз норуота бу күн 250 киилэ хортуоска, 225 киилэ эриэппэ луугу, 100-тэн тахса киилэ моркуоп, 50 киилэ арбуз уонна яблоко итиэннэ 22 киилэ дыня аҕалан биэрдилэр. Чахчы эмсэҕэлээбит олохтоохторго сибиэһэй оҕуруот аһа уонна фуруукта дьиҥ көмө буолуо.

Билигин номнуо 5 туонна гуманитранай көмө таҥас-сап, ас-үөл онтон да атын эмсэҕэллээччилэргэ наадалаах мал-сал миэстэтигэр тиийдэ. Ол да буоллар көмө син биир наада. Билигин хомуллубут көмө үөһээ салгынынан Өймөкөөҥҥө тиийэр.

Лидия Алексеева, үтүө көмөһүт: «Биир сөмөлүөт, биир бөртөлүөт барбыт. Бэҕэһээ икки массыына барда. 5 күнү быһа хомуйа сылдьабыт. Харчынан көмө күүтэллэр, бородууктаны мантан ылан ыытабыт».

Маныаха кыра оҕолоохторго үүт, пюре, хааһы, подгузниктар наадалаахтар диэн волонтердар тоһоҕолоон этэллэр.

Оттон билигин халааҥҥа улаханнык эмсэҕэллэбит Өймөкөөн дэриэбинэтигэр 13 хамыһыйа тэриллэн, олбуорунан сылдьан хорумньуну ааҕыы үлэлэрин ыытан саҕалаатылар.

Валентин Васильев, "Өймөкөөн" МТ баһылыга: «Быыһааччылары кытта сайаапканан ууга барбыт дьоннорго көмөлөһөбүт».

Манна даҕатан эттэххэ, уу таһыма 464см тэҥнэһэр. Муҥуутуур чыпчаал 480 тиийэр. Уу кыра кыралаан дэрибинэлэртэн түһэн эрэрин суһал ыстаап иһитиннэрэр. Эвакопууннар үлэлии тураллар.

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччы: «Временнай пууннарга Өймөкөөн улууһугар 7 киһи хаалбыт, Абый улууһугар 2 киһи. Тымныы түһүөр дылы барытын бүтэрэр сорудахтаахпыт».

Билигин ууга барбыт нэһилиэктэргэ МФЦ, үлэ, туттуу, тыраанспар уонна тыа хаһаайыстыбатын министиэристибэтин үлэһиттэрэ тиийэн докумуоннарга көмөнү оҥороллор.