Өймөкөөн улууһугар уу сорох сирдэринэн арыый түһэн эрэр

Өймөкөөн олохтооҕо Марта Смирнова дьиэтин уу ылбыт содулун көрдөрөр. Билигин кини олорор эҥэр уу түспүт, аны хоромньуну ааҕыы, дьиэни чөлүгэр түһэрии түбүгэ саҕаланыаҕа. Оттон бүтэһик ааҕыы көрдөрүүтүнэн Өймөкөөн улууһугар 90 тахса дьиэ ууттан эмсэҕэлээбит, манна балтараа тыһыынчаттан тахса киһи олорор. Ил Дархан Айсен Николаев соруйуутунан күн бэҕэһээ тустаах улууска бырабыытылыстыба үлэлиир бөлөҕө бары наадалаах малы-салы, аһы-үөлү, оттугу илдьэ итиэннэ хоромньуну ааҕа көттүлэр.

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччыта: «Өймөкөөн улууһугар элбэх хорумньу таҕыста. Ол курдук, 7 социальнай эбийиэк ууга барбытын бэлиэтиибит».

Айылҕа ааннаабыт алдьархайа салгынтан көстүүтэ киһини дьиксиннирэр. Сайыҥҥы халаан уута биир улахан долгунунан Өймөкөөн бөһүөлэктэрин ылбыт. Хас да социальнай эбийиэк, дьон олорор дьиэтэ, тиэргэннэр ууга бардылар. 

Олохтоохор оҥочонон сылдьаллар. Билигин уу эрэ аалынан дэриэбинэлэр устун сылдьар кыах баар. Бу тырааныспарынан быыһааччылар дьону эвакуациялыыллар, наадалаах малы-салы, аһы-үөлү тиэрдэллэр. Күн бүгүн Өймөкөөн улууһугар ыксаллаах быһыы-майгы министиэристибэтин итиэннэ өрөспүүбүлүкэтээҕи быыһыыр сулууспа быыһааччылара үлэлииллэр.

Ким Сокорутов, СӨ быыһыыр сулууспатын аэромобильнай этэрээтин быыһааччыта: «Өймөкөөн улууһугар гуманитарнай көмө оҥордубут. Дьон малын илдьэн биэрдибит. Олохтоохтор администрацияҕа сайаапка биэрэллэр».

Билигин олохтоохторго астан-үөлтэн саҕалаан эмпкэ-томко тиийэ барыта наада. Маныаха киин куоракка баар Өймөкөөн улууһун землячествотын көхтөөх дьоно суһал көмө ыстаабын тэрийдилэр. Онон хас биирдии көмөлөһүөн баҕалаах Курашова 24 нүөмэрдээх дьиэтигэр, 4 этээскэ, 401 кабинетка кэлэн көмөнү оҥоруоххутун сөп. Ордук эмп-томп итиэннэ уу хачайдыыр помпа наада диэн биллэрэллэр.

Алексей Федотов, Өймөкөөн улууһун баһылыгын солбуйааччы: «Бастатан туран дьиэни куурдар, ууну хачайдыыр мотопомпалар наада буолаллар. Ону таһынан дьаһалталарга олус элбэх кумаахы, үп ирдэниэҕэ докумуон бэлэмнииллэригэр».

Оттон Өймөкөөн улууһун таһынан Муома уонна Абый улууһугар эмиэ балаһыанньа уустук. Муомалар билигин уу иккис кэлиитигэр бэлэмнэнэллэр, маныаха эрдэттэн сылгыны-сүөһүнү куттала суох үрдүк сиргэ суһаллык көһөрдүлэр. Салгыы үлэ барар. Балаһыанньа бырабыытылыстыба хонтуруолугар турар.